Mourinho ashpër ndaj Tebas: Ka vija të kuqe që nuk duhen kaluar

Në prag të sfidës së kampionatit spanjoll ndaj Sevillas, trajneri i njohur Jose Mourinho ka dalë në një konferencë për shtyp, ku është ndalur te çështjet më të nxehta të aktualitetit futbollistik, duke mos e kursyer një replikë të fortë për presidentin e La Liga-s, Javier Tebas, i cili së fundmi bëri një krahasim të diskutueshëm mes strategjisë së Real Madridit dhe metodave të propagandës naziste të Joseph Goebbels. Duke iu referuar deklaratave të bujshme të kreut të La Liga-s, portugezi u tregua mjaft kritik: “E keni parë tashmë se çfarë mendoj. Ai ka hyrë në një fushë ku mund të justifikohesh vetëm nëse bëhet fjalë për një rast klinik. Madrilenët e kuptojnë se me çfarë përballet Reali. Edhe duke pasur parasysh prestigjin e jashtëzakonshëm që futbolli spanjoll gëzon jashtë vendit, Botërorin dhe klubin më prestigjioz, është më mirë që kjo çështje të mbetet vetëm këtu”. Gjatë bashkëbisedimit me gazetarët, tekniku u ndal edhe te talenti i ri Arda Güler dhe roli i tij si organizator loje: “Ka punë për t’u bërë, por ju e keni të vështirë t’i jepni meritën punës. Duket sikur gjërat negative kanë gjithmonë një autor, ndërsa ato pozitive janë pasojë e dështimit ose e fatit. Arda është një lojtar me shumë talent, këtë e dimë. Sigurisht, nuk është ende një produkt i përfunduar, sepse është vetëm 21 vjeç. Ka cilësitë për të luajtur në disa role. Jam shumë i kënaqur me të”. Mourinho foli gjithashtu edhe për kërkesat e tij taktike ndaj mesfushorëve: “Iu kërkoj të jenë mesfushorë dhe të bëjnë punën që kërkon ky rol. Një lojtar që vetëm mbrohet është i kufizuar. Nëse vetëm sulmon, është më mirë të luajë në krah ose si numër 10. Është një pozicion shumë i vështirë. Për të qenë në nivelin më të lartë, duhet të kesh cilësi të veçanta”. Në fund, ai bëri një analizë të situatës fizike të skuadrës dhe rivalit të radhës, Sevillas: “Jemi të lodhur, por nesër do të jetë një sfidë tjetër. Sipas asaj që kam parë nga stafi mjekësor, lojtarët që kanë luajtur më shumë minuta janë të lodhur. Në shtëpi kemi mundësi të bëjmë disa ndryshime dhe t’i japim freski skuadrës. Sevilla është në formë, edhe në ndeshjet që ka humbur ka konkurruar denjësisht. Luis García po bën një punë të shkëlqyer. Sezonin e kaluar arriti të shpëtonte skuadrën nga rënia. Ne duam të fitojmë”.