Ndikimi i Adrien Rabiot rritet te Milani, klubi nis menjëherë bisedimet për rinovimin afatgjatë

Pavarësisht ndryshimeve në stol dhe ardhjes së Ruben Amorim, Adrien Rabiot mbetet shtylla kryesore e mesfushës kuqezi. Paraqitja e tij e fundit në “Europa League” ishte dëshmi e qartë e kësaj rëndësie, ku mesfushori francez la shenjë në të tria golat e shënuara nga talenti i ri Alphadjo Cisse: ai dhuroi pasimin vendimtar për golin e tretë dhe ndërtoi aksionet që sollën dy realizimet e para. Statistikat flasin qartë për ecurinë e tij në këtë nisje sezoni. Në tetë sfidat e para mes kampionatit dhe kompeticioneve evropiane, Rabiot ka shënuar 3 gola dhe ka dhënë 3 asiste, duke dëshmuar një formë edhe më të lartë dhe të qëndrueshme në krahasim me periudhën kur drejtohej nga mentori i tij, Massimiliano Allegri. Ky kulm formë vjen pas një vere të tensionuar, gjatë së cilës pati bisedime sqaruese me drejtuesit e klubit, ku mesfushori zgjodhi përfundimisht të qëndronte për të dhënë kontributin maksimal për ngjyrat kuqezi. Përkushtimi i tij në fushë ka shtyrë drejtuesit e klubit të ndërmarrin hapa konkretë. Janë hapur zyrtarisht diskutimet për të zgjatur bashkëpunimin deri në vitin 2030, ndërsa synimi i drejtuesve është që marrëveshja e re të zyrtarizohet brenda përfundimit të vitit 2026. Tanimë është vendosur kontakti i parë me nënën dhe agjenten e lojtarit. Drejtuesit milanistë po shtojnë përpjekjet për të mbyllur me sukses këtë çështje dhe, pas rinovimit të mbrojtësit Pavlovic gjatë këtyre ditëve, në Milano presin që firma e francezit të jetë lëvizja e radhës zyrtare.