Ndryshim drastik i motit: E premta sjell rënie të temperaturave, rrebeshe shiu dhe dëborë në male

Ditën e premte vendi ynë do të ndikohet nga depërtimi i një fronti atmosferik të ftohtë dhe mjaft intensiv, i cili do të diktojë vranësira të dendura dhe reshje të herëpashershme shiu. Në zona të caktuara, këto reshje do të jenë në formën e rrebesheve të forta, ndërsa nuk përjashtohet mundësia edhe për shkarkesa elektrike. Ndërkohë, në zonat e larta malore pritet të shënohen reshjet e para të dëborës. Sa i përket parametrit të erës, ajo do të fryjë nga drejtimi i verilindjes. Në momente të caktuara dhe në lokalitete specifike, era pritet të jetë mjaft e vrullshme, duke arritur shpejtësinë nga 15 deri në 41 km/h. Ky ndryshim i kushteve meteorologjike do të sjellë edhe një rënie të ndjeshme të vlerave termike në të dyja ekstremet. Temperaturat minimale parashihet të lëvizin ndërmjet 8 dhe 11°C, ndërsa ato maksimale gjatë ditës do të luhaten nga 11 deri në 16°C.