Fundjavë me intervale me diell dhe vranësira, temperaturat pritet të pësojnë rritje të lehtë të dielën

Instituti Hidrometeorologjik i Kosovës (IHMK) ka publikuar parashikimin e motit për fundjavën e ardhshme, përkatësisht për datat 17 dhe 18 tetor, ku vendi ynë do të ndikohet nga kushte atmosferike me diell dhe vranësira kalimtare. Gjatë ditës së shtunë, termometrat do të shënojnë vlera minimale që do të lëvizin mes 0 dhe 3 gradë Celsius, ndërsa temperaturat maksimale do të kapin shifrat nga 10 deri në 15 gradë. Ndërkaq, të dielën vlerat minimale do të mbeten të njëjta, nga 0 deri në 3 gradë, por do të ketë një ngritje të temperaturave maksimale, të cilat do arijnë ndërmjet 13 dhe 17 gradë Celsius. Për sa i përket erës, ajo do të fryjë kryesisht nga drejtimi i verilindjes përgjatë ditës së shtunë. Për nesër, përkatësisht të dielën, masat e ajrit do të vijnë nga verilindja dhe veriperëndimi, duke ruajtur një shpejtësi të ulët. Nga ana tjetër, IHMK bën të ditur se situata biometeorologjike paraqitet kryesisht e favorshme, pavarësisht se orët e mëngjesit dhe ato të mbrëmjes do të jenë dukshëm më të freskëta. Këto temperatura të ulëta kërkojnë vëmendje të shtuar për sektorin e bujqësisë, veçanërisht për mbrojtjen e kulturave bujqësore që janë të ndjeshme ndaj të ftohtit dhe rrezikut të ngricave të hershme në zona të caktuara.