Protesta e studentëve, Berisha i bën thirrje kombit: Të mbështesim rininë përballë dhunës policore

Kreu i Partisë Demokratike, Sali Berisha, i është drejtuar opinionit publik me një apel urgjent për solidaritet, duke u bërë thirrje qytetarëve, prindërve, të rinjve dhe bashkatdhetarëve në diasporë që t'i dalin në krah nxënësve të shkollave të mesme dhe studentëve në tubimin e paralajmëruar për nesër në kryeqytet. Në mesazhin e tij, Berisha ka hedhur akuza të forta ndaj Policisë së Shtetit, duke pohuar se që prej datës 13, forcat e rendit kanë përdorur dhunë të pajustifikueshme ndaj të rinjve që kanë dalë në sheshet dhe rrugët e Tiranës. Sipas tij, aksionet e policisë kanë sjellë ndalimin dhe arrestimin e qindra protestuesve, mes të cilëve ka edhe të mitur, vajza dhe qytetarë të grupmoshave të ndryshme. Ndër të tjera, lideri i opozitës ka denoncuar përdorimin e mjeteve të dhunshme nga efektivët, përfshirë plumbat e gomës, gazin lotsjellës, granatat zhurmuese, sprajin dhe shkopinjtë e gomës, duke pretenduar se këto ndërhyrje kanë lënë pas protestues të plagosur rëndë. Duke e vënë theksin te shkalla e dhunës, ai e ka krahasuar situatën aktuale me ngjarjet e viteve '90, duke theksuar se Tirana nuk ka përjetuar kurrë më parë një trajtim të tillë brutal ndaj rinisë. “Nesër gjimnazistët dhe studentët e Tiranës kanë më shumë se kurrë nevojë për mbështetjen e çdo shqiptari në betejën e tyre epike. Në betejën e tyre të pamposhtur”, u shpreh Berisha. Më tej, ai paralajmëroi se gjatë ditës së nesërme, mijëra qytetarë të të gjitha moshave, nga burra e gra te djem e vajza, do të derdhen në Tiranë nga e gjithë Evropa. “Ftoj çdo demokrate e demokrat, çdo qytetare e qytetar, çdo prind, nënë, baba, ftoj të gjitha bizneset e vendit të solidarizohemi nesër në Tiranë me studentët, të cilët në këtë betejë epike po mbrojnë më shumë se çdo gjë tjetër të ardhmen e tyre në këtë vend, ëndrrën e tyre shqiptare nga një zjarrvënës, armik i egër i kombit. Po mbrojnë dinjitetin e qytetarëve shqiptarë. Janë ngritur viganë kundër bandave të drogës në qeveri, narkoshtetit me pasojat e tij shkatërrimtare, kreut të këtij narkoshteti, Padrinos Edi Rama. Solidariteti dhe mbështetja jonë për studentët është e një rëndësie të jashtëzakonshme. Ora e historisë fton nesër çdo shqiptar në Tiranë”, përfundoi deklaratën e tij Berisha.