Murat Yakin thur elozhe për Ardon Jasharin pas triumfit bindës të Zvicrës në Shkup

Përfaqësuesja e Zvicrës ka demonstruar fuqinë e saj të vërtetë në stadiumin “Todor Proeski” në Shkup, duke shfaqur një performancë mbresëlënëse ndaj Maqedonisë së Veriut. Me një dominim të plotë përgjatë gjithë takimit, helvetikët siguruan një fitore të pastër me rezultatin 0:3. Skuadra zvicerane, e cila la gjurmë pozitive në Kampionatin e fundit Botëror duke u kualifikuar në fazën eliminatore, e konfirmoi formën e lartë edhe në këtë përballje, duke u rikthyer në shtëpi me tri pikë të merituara. Pas vërshëllimës së fundit të gjyqtarit, përzgjedhësi Murat Yakin ndau mbresat e tij, duke vënë theksin te kontributi i lojtarëve të rinj. “Zhvilluam një ndeshje fantastike, ku për pak sa nuk e thelluam edhe më shumë epërsinë. Akomodimi i futbollistëve të rinj në grup ka qenë mjaft efikas. Jam veçanërisht i kënaqur me paraqitjen e Ardon Jasharit, i cili dëshmoi stabilitet dhe nivel të lartë si në detyrat mbrojtëse, ashtu edhe në ato sulmuese”, deklaroi tekniku zviceran. Në fjalën e tij, Yakin nuk la pa përmendur as Denis Zakarian, i cili ishte protagonist kryesor me dy asistime të sakta. “Jam i lumtur për Zakarian, kontributi i tij ishte vendimtar në një ndeshje me ritëm shumë të lartë”, shtoi ai. Fitorja e Zvicrës u vulos nga dopieta e Zeki Amdounit dhe goli i shënuar nga Remo Freuler. Një vëmendje e veçantë iu kushtua edhe Ardon Jasharit, i cili pati një paraqitje solide në qytetin ku ndodhen rrënjët e familjes së tij, duke marrë kështu vlerësimin maksimal nga stafi teknik.