Skenari i madh në Old Trafford: Si mund të transformojë Manchester Unitedin Antonio Conte?

Ndërsa emri i Antonio Contes po luan fuqishëm si pasardhës i mundshëm i Michael Carrick, opinionit sportiv i është ofruar një pamje se si mund të duket formacioni i Manchester Unitedit nën drejtimin e strategut italian. Të dielën pasdite, “Djajtë e Kuq” udhëtojnë drejt “Elland Road” për t’u ndeshur me rivalin e tyre Leeds United, në një duel që konsiderohet vendimtar për të ardhmen e trajnerit Carrick dhe mundësinë e tij për të mbajtur postin. Nëse drejtuesit e klubit vendosin ndarjen nga Carrick vetëm dy muaj pas nisjes së sezonit, eksperti i dëshmuar i Premierligës, Antonio Conte, shihet si kandidati kryesor për të marrë frerët e skuadrës dhe për të sjellë ndryshime rrënjësore taktike. I lirë nga detyrimet pas largimit nga Napoli në mbyllje të sezonit të kaluar, Conte po lakohet fuqishëm për një kalim sensacional te Unitedi, lëvizje kjo që synon të kthejë rrjedhën e mbarëvajtjes aktuale të skuadrës. Ish-trajneri i Chelseat, me të cilin ka triumfuar si në Premierligë ashtu edhe në Kupën FA, la të kuptohet gjatë një bisede të fundit se e sheh me interes sfidën e drejtimit të një gjiganti si Unitedi. Duke bërë një prononcim për “The Athletic”, ai u shpreh: “Nëse shkon te një klub, historia e të cilit flet vetë – një histori e përbërë nga trofe, tituj të ligës dhe fitore – mund ta nderosh atë histori vetëm në një mënyrë: duke pasur ambicien për ta rikthyer atë klub, nëse sot nuk është në atë nivel, në garën për ato objektiva”. Më tej, ai shtoi: “Ka shumë klube që e kanë humbur disi lidhjen me historinë e tyre. Do të doja të shkoja te njëri prej këtyre klubeve, për ta nxjerrë atë histori nga pluhuri dhe për ta bërë të shkëlqejë sërish. Klube ku ka presion, ku, në fund të fundit, e di shumë mirë se nuk shkon thjesht për të marrë pjesë, por për të garuar”. Duke pasur parasysh ecurinë negative të Unitedit, me një serë prej pesë ndeshjesh pa fitore, renditjen në vendin e 13-të në Premierligë dhe eliminimin e hershëm nga Carabao Cup qysh në ndeshjen e parë, duket se Conte do ta mirëpriste sfidën e ndryshimit të kësaj panorame. Megjithatë, marrja e drejtimit të skuadrës prej tij do të sillte lëvizje të bujshme në merkato dhe skemën e lojës. Ja si mund të rreshtohej ekipi nën udhëheqjen e tij. Që nga transferimi nga Royal Antwerp kundrejt një shume fillestare prej 21 milionë eurosh (18.1 milionë funte), portieri belg Senne Lammens është shndërruar në një nga shtyllat kryesore të skuadrës, çka do t'i garantonte atij ruajtjen e vendit të titullarit edhe në planet e Contes. Aksioni i parë i rëndësishëm i trajnerit italian do të ndodhte në mbrojtje, pasi ai pritet të implementojë skemën e tij të preferuar 3-4-3 me tre qendërmbrojtës. Duke vlerësuar deklaratat e tij të fundit pas disfatës 2-0 në Ligën e Kampionëve kundër Atletico Madridit, gjasat janë minimale që Lisandro Martinez të ketë një të ardhme afatgjatë nën urdhërat e Contes, duke u bërë kështu lojtari i parë i rëndësishëm që mund të largohet nga planet e italianit. Në vend të tij, në “Teatrin e Ëndrrave” mund të zbarkojë Nico Schlotterbeck i Borussia Dortmundit, me mbrojtësin e kombëtares gjermane që është lidhur intensivisht me një kalim në futbollin anglez gjatë muajve të fundit. Edhe pse Liverpooli është përfolur si pretendent kryesor për shërbimet e 26-vjeçarit, Manchester Unitedi do të kishte shanse konkrete për ta transferuar nëse do të paguante klauzolën e raportuar të largimit prej 50-60 milionë eurosh (43.5-52.2 milionë funte), e cila vlen specifikisht për klubet elitare evropiane. Përkrah tij, në repartin e prapavijës pritet të pozicionohen Harry Maguire dhe Matthijs de Ligt, ky i fundit në pritje të rikuperimit të plotë nga dëmtimi afatgjatë gjatë javëve në vijim.