Inspektim në veri: Krerët e Policisë së Kosovës vizitojnë njësitë kufitare dhe patrullat e përbashkëta me KFOR-in

Drejtori i Përgjithshëm i Policisë së Kosovës, kolonel Gazmend Hoxha, i shoqëruar nga drejtori i Departamentit për Kufi, nënkolonel Fehmi Xhata, kanë zhvilluar një vizitë zyrtare në rajonin verior të vendit. Aty ata kanë inspektuar njësitë policore kufitare, ekipet e ndërhyrjes së shpejtë, njësitë e kontrollit kufitar ujor, si dhe patrullat e përbashkëta që po zhvillohen mes Policisë së Kosovës dhe trupave të KFOR-it. Sipas njoftimit zyrtar, gjatë këtij terreni, udhëheqja e lartë policore është takuar me efektivët e vijës së parë të frontit, duke u njohur në detaje me sfidat, punën e përditshme dhe operacionet e terrenit. Theks i veçantë iu vu monitorimit të brezit kufitar, respektivisht vijës së gjelbër dhe asaj të kaltër, me qëllim të rritjes së sigurisë publike dhe goditjes së dukurive të krimit transkufitar. Me këtë rast, menaxhmenti i Policisë së Kosovës ka shprehur mirënjohjen dhe ka përgëzuar secilin zyrtar për përkushtimin dhe sakrificën e treguar në ruajtjen e rendit, qetësisë dhe stabilitetit në të gjithë territorin e Republikës së Kosovës. Ky angazhim në terren është përmbyllur me një aksion të përbashkët patrullimi së bashku me njësitet e specializuara të kontrollit kufitar ujor.