Hysaj zbulon prapaskenat e asistit 'të çuditshëm' dhe flet për të ardhmen: I kam bërë një propozim Dukës

Mbrojtësi i Kombëtares shqiptare, Elseid Hysaj, ka qenë një prej figurave kryesore në fitoren e fundit, duke dhuruar një asist mjaft të pazakontë për golin e Ernest Muçit. Në një intervistë për “Supersport”, shkodrani ka analizuar momentin e veçantë të ndeshjes, duke e krahasuar atë me stilin e famshëm të Inzagit. “Ishte një situatë ku kundërshtari po tentonte të kundërsulmonte me shpejtësi. Kur pashë topin, vendosa të ndërhyj dhe për mua ky mbetet asisti më i bukur i karrierës sime, disi i ngjashëm me golat e Inzagit. Jam shumë i lumtur për këtë fitore, pasi si grup e meritonim pas ndeshjeve të kaluara ku pati keqkuptime për lojën tonë dhe atë të trajnerit”, u shpreh Hysaj. Futbollisti vlerësoi ndryshimin taktik të ekipit, duke theksuar se kalimi në mbrojtje me tre lojtarë ka sjellë një frymë më sulmuese. Sipas tij, prania e Hoxhës dhe Muçit në mbështetje të Manajt ka ndihmuar skuadrën të krijojë më shumë raste shënimi, duke dëshmuar qasjen e re të stafit teknik. Sa i përket të ardhmes së tij, Hysaj zbuloi me humor një bisedë me presidentin e Federatës, Armand Duka: “I kam propozuar Dukës të bëj një kontratë për të luajtur vetëm për Kombëtaren dhe të rri pushim pjesën tjetër. Në fakt, pas impenjimeve me përfaqësuesen do të marr një vendim për karrierën time. Tregu i transferimeve ka luhatjet e veta dhe unë i kam dhënë vetes pak më shumë kohë se ç’duhet”. Duke mbyllur prononcimin e tij, mbrojtësi siguroi se zgjidhja për skuadrën e re do të vijë së shpejti. Hysaj la të kuptohet se është në pritje të një mundësie interesante, ndoshta në një kampionat që më parë dukej i paarritshëm, duke shprehur besimin se pas ndeshjeve të Kombëtares do të ketë zhvillime të reja për të ardhmen e tij.