Gjiganti katalanas vë syzet te Vedat Muriqi: Zbardhet lista e Deco-s për sulmin

Klubi i Barcelonës ka nisur kërkimet në treg për të gjetur një sulmues me përvojë dhe kosto të përballueshme financiare, teksa drejtori sportiv Deco ka ngushtuar rrethin e zgjedhjeve në tri emra kryesorë: Vedat Muriqi, Ayoze Perez dhe Aleksandar Mitroviq. Sulmuesi i Kombëtares së Kosovës, Vedat Muriqi, 32 vjeç, u transferua te radhët e Fenerbahçes gjatë merkatos së verës së vitit 2026. Ai ka arritur të shënojë gjashtë gola në elitën e futbollit turk, ndërsa kujtohet mirë për paraqitjet e shkëlqyera një sezon më parë te Mallorca në La Liga, ku realizoi plot 23 herë. Kartoni i tij aktual llogaritet në vlerën e rreth 7 milionë eurove. Pjesë e kësaj liste të ngushtë është edhe spanjolli Ayoze Perez, 33 vjeç, i cili aktivizohet me Villarrealin dhe ka një vlerë tregu që sillet rreth 5 milionë euro. Ndërkohë, opsioni i tretë është serbi Aleksandar Mitroviq, 32 vjeç, i cili aktualisht luan për Al-Rayyan në Katar, megjithëse paga e tij e majme mund të përbëjë një pengesë serioze për finalizimin e marrëveshjes. Krerët e Barcelonës janë në kërkim të një profil lojtari që garanton gola dhe pjekuri në fushë, pa qenë nevoja e kryerjes së investimeve marramendëse. Deri në këto momente, drejtuesit e klubit nga ‘Camp Nou’ nuk kanë ndërmarrë hapa konkretë dhe nuk kanë paraqitur oferta zyrtare për asnjërin nga pretendentët e përzgjedhur.