Përplasje e fortë në Spanjë: Real Madridi kërkon largimin e menjëhershëm të Javier Tebasit

Klubi i njohur spanjoll, Real Madridi, ka ndërmarrë një hap të fortë institucional duke kërkuar dorëheqjen e menjëhershme të Javier Tebasit nga pozita e presidentit të LaLigës dhe ajo e zëvendëspresidentit të Federatës Spanjolle të Futbollit. Ky reagim drastik vjen si pasojë e deklaratave të fundit të Tebasit që lidhen me linjën mediatike të ndjekur nga gjiganti madrilen. Përmes një komunikate zyrtare, drejtuesit e klubit kanë shprehur indinjatën e tyre të thellë ndaj krahasimeve që, sipas tyre, kreu i LaLigës i ka bërë ndërmjet qasjes së televizionit zyrtar të klubit, RMTV, dhe metodave të propagandës fashiste të Joseph Goebbelsit. Los Blancos i kanë etiketuar këto deklarata si tejet të rënda dhe të papranueshme, duke nënvizuar se ato kanë për qëllim të vetëm dëmtimin e imazhit të institucionit, udhëheqjes së tij dhe mediumit zyrtar të klubit. “Real Madridi konsideron absolutisht të papranueshme dhe tejet serioze që një person që mban dy pozitat me përgjegjësinë më të lartë në futbollin spanjoll të përdorë krahasime të tilla me qëllim diskreditimin e klubit tonë”, thuhet shprehimisht në njoftimin e gjigantit nga kryeqyteti spanjoll. Më tej, klubi mbretëror ka vënë në shënjestër atë që e cilëson si mungesë totale të paanshmërisë, neutralitetit dhe respektit institucional nga ana e Tebasit, duke argumentuar se sjellje të tilla bien ndesh hapur me funksionet e larta që ai ushtron në sportin spanjoll. Për shkak të këtyre veprimeve, Real Madridi ka kërkuar shkarkimin ose largimin e menjëhershëm të tij nga të dyja postet vendimmarrëse në strukturat e futbollit të Spanjës. Raportet mes dy palëve kanë qenë vazhdimisht të tendosura, të karakterizuara nga përplasje të shpeshta për mënyrën se a duhet drejtuar futbolli spanjoll. Ky zhvillim i fundit shton një tjetër episod të nxehtë në armiqësinë e gjatë mes drejtuesve të LaLigës dhe kampiones spanjolle.