Zbulimi i bujshëm: Roman Abramovich kishte në plan blerjen e një tjetër skuadre evropiane

Ish-pronari i njohur i Chelseat, Roman Abramovich, kishte shfaqur interesim konkret për të marrë në pronësi klubin francez Nantes, me qëllim që ta shndërronte atë në një skuadër satelit të gjigantit londinez. Këto prapaskena janë bërë publike nga Christophe Lollichon, ish-trajneri i portierëve te skuadra angleze, i cili ka dëshmuar se miliarderi rus ishte interesuar gjerësisht rreth organizimit të brendshëm dhe filozofisë së lojës së klubit francez. Sipas dëshmisë së Lollichonit, manjati rus madje kishte projektuar një plan logjistik, duke përfshirë transportin me avion të ekspertëve që do të mbështesnin implementimin e modelit taktik në skuadër. Megjithatë, ky plan mbeti vetëm në letër. Pas një periudhe dy-mujore, Abramovich vendosi të tërhiqej përfundimisht nga ky synim, pasi arriti në përfundimin se Nantes përbënte një strukturë shumë të madhe për vizionin dhe kapacitetin e projektit që synonte të ndërtonte.