“Prindërit e dinë që jam këtu”: Gjimnazistja 17-vjeçe flet nga sheshi i protestës dhe tregon mbështetjen e familjes

Një nxënëse 17-vjeçe e gjimnazit ka ndarë dëshminë e saj nga zhvillimet në protestë, duke sjellë në vëmendje sfidat, përdorimin e gazit lotsjellës dhe përballjen e qytetarëve me situatën e tensionuar në terren. E mitur, e cila ka bojkotuar mësimin për t'iu bashkuar tubimit, ka theksuar se familja e saj jo vetëm që është në dijeni të pranisë së saj atje, por edhe e mbështet plotësisht, ndërkohë që frika e vetme e prindërve mbetet rreziku i mundshëm i dhunës. “Filluan t’i ngacmonin vetë policët ata, reaguan me gaz lotsjellës, kalimtarët na hodhën ujë në sy. Unë jam 17-vjeçe, në gjimnaz. Kam bojkotuar mësimin. Sipas meje, kjo lloj proteste është e merituar, duhet ta kishim pritur më parë. Prindërit e dinë që kam ardhur në protestë, më mbështesin”, është shprehur ajo. Duke treguar masat e sigurisë që ka marrë për të qetësuar familjen, ajo shtoi: “Ata kanë frikë vetëm dhunën këtu, më thonë: “Keni kujdes.” Mamit i kam hapur lokacionin, kam një orar që duhet të shkoj në shtëpi, mundohem t’i ndihmoj të tjerët që i shoh keq, i ndihmoj me gjërat që kemi: fasuleta, ujë dhe ujë fiziologjik. Kam ardhur me shoqen e ngushtë sot, kurse shoqëria tjetër del pasdite.”