Skandal në Spitalin Amerikan 2: Foshnja e gabuar i dorëzohet nënës, zbulohet se infermierja ishte e palicencuar

Një ngjarje tronditëse dhe e paprecedentë ka tronditur ambientet e “Spitalit Amerikan 2” (American Hospital Kosova II) në Graçanicë, ku një foshnjë e sapolindur është ngatërruar nga personeli mjekësor, duke i dorëzuar në shtrat një foshnjë tjetër nënës së mitur. Ky gabim skandaloz ka ndodhur më 18 mars 2026, vetëm pak orë pas ardhjes në jetë të foshnjës. Sipas dokumentacionit zyrtar të disponuar nga redaksia jonë, nëna e foshnjës kishte reaguar menjëherë duke pohuar se foshnja nuk ishte e saj, mirëqenia dhe shqetësimi i së cilës u neglizhuan tërësisht nga stafi mjekësor. Dokumentet e siguruara nga inspektimet e kryera nga inspektorët shëndetësorë në “American Hospital Kosova II”, pas denoncimit të bërë nga babai i foshnjës, dëshmojnë për një situatë me përmasa dramatike të ngjashme me skenarët e filmave thriller. Në ankesën zyrtare të dorëzuar nga babai i foshnjës, D.M. (identiteti i të cilit ruhet nga redaksia), sqarohet se stafi mjekësor e kishte marrë beben rreth orës 23:00 më 18 mars, ndërsa të nesërmen i kishin kthyer bashkëshortes së tij një foshnjë tjetër. Ai shpjegon se pavarësisht alarmimit të infermiereve, ato fillimisht kishin hedhur poshtë çdo mundësi të ngatërresës së foshnjave. Vetëm pas këmbënguljes së fortë të tij u krye verifikimi i detyrueshëm, i cili solli në pah konstatimin se foshnja ishte vërtet e ndërruar. Në deklaratën me shkrim dhënë Inspektoratit Shëndetësor, infermierja Anlisa Latifi ka treguar se pasi u alarmua nga familjarët, ajo u nis drejt dhomës së pacientes. Ajo ka pranuar se një gabim i tillë i dukej i pamundur, por ndërkohë prindërit këmbëngulnin duke bërë krahasime me fotografitë e foshnjës të shkrepura ditën e mëparshme. Infermierja theksoi në dëshminë e saj se pasi kërkoi varësen identifikuese që vendoset në dorën e foshnjës gjatë lindjes, vuri re se aty figuronte emri i një pacienteje tjetër, moment ky ku kuptoi se foshnja e pranishme në dhomë nuk i përkiste çiftit. Menjëherë pas denoncimit të rastit nga D.M., inspektorët shëndetësorë zbarkuan për një kontroll të jashtëzakonshëm në “American Hospital Kosova II”. Ky spital, ndonëse mban emër amerikan, zotërohet nga një kompani shqiptare, ndërsa faqja zyrtare e saj konfirmon se drejtor ekzekutiv është biznesmeni Klodian Allajbeu. Sipas raportit të inspektimit, pas marrjes së ankesës nga pacientja J.K., Inspektorati Shëndetësor ka grumbulluar deklaratat me shkrim të mjekëve që kanë ndjekur rastin, si dhe të gjithë dosjen mjekësore të pacientes në fjalë. Inspektoriati ka konfirmuar se stafi shëndetësor i “American Hospital Kosova II” dështoi të trajtojë me seriozitet shqetësimin e nënës dhe nuk ndërmori verifikimin e menjëhershëm. Vetëm pas insistimit të saj u kontrollua shiriti identifikues, ku dolën në dritë parregulsitë e rënda. Gjithashtu, raporti evidenton se në “American Hospital Kosova II” ka pasur mangësi serioze procedurale gjatë identifikimit dhe dorëzimit të foshnjës te nëna. Në përfundim të gjetjeve, inspektorët kanë konfirmuar se drejtori menaxhues i “American Hospital Kosova II”, Ledio Bazaiti, ka pranuar zyrtarisht ndodhjen e këtij gabimi fatal që solli si pasojë ngatërrimin e foshnjave.