Fushata “Tetori Rozë”: IKShPK mobilizon të gjitha rajonet e Kosovës për ndërgjegjësimin ndaj kancerit të gjirit

Instituti Kombëtar i Shëndetësisë Publike të Kosovës (IKShPK) ka ndërmarrë një sërë nismash në mbarë vendin për të shënuar muajin e ndërgjegjësimit ndaj kancerit të gjirit, i njohur ndërkombëtarisht si “Tetori Rozë”. Këto ngjarje po implementohen përmes Qendrave Rajonale të Shëndetit Publik, në bashkëpunim të ngushtë me institucionet shëndetësore, ato arsimore dhe partnerë të ndryshëm lokalë. Në qytetin e Pejës, krahas sesioneve edukative, qytetarët kanë dhuruar flokët e tyre si gjest solidariteti me gratë që po luftojnë kundër kësaj sëmundjeje. Ndërkaq, në Prizren, mbijetuesit e kancerit të gjirit së bashku me organizatën “Burrneshat” kanë mbjellë fidanë në shenjë shprese, ndërkohë që janë zhvilluar edhe ligjërata ndërgjegjësuese në disa zona të ndryshme. Në Mitrovicë është mbajtur marshimi tradicional në përkrahje të grave të prekuara nga ky malinjitet, kurse në Gjilan, Ferizaj dhe Prishtinë janë organizuar ligjërata informuese nëpër shkolla, institucione publike dhe qendra mjekësore për të rritur vetëdijen qytetare. Përmes kësaj fushate, IKShPK synon të informojë opinionin publik rreth faktorëve të rrezikut, shenjave klinike dhe domosdoshmërisë së kontrolleve preventive, me theks të veçantë te diagnostikimi i hershëm, i cili mbetet çelësi kryesor për shërim të suksesshëm.