Hyrja në SEPA, Kurti zbulon shifrën: Kosova do t'i kursejë 58 milionë euro në vit

Kryeministri i vendit, Albin Kurti, ka shprehur mirënjohjen e tij për deputetët e Kuvendit pas miratimit në lexim të dytë të paketës së amendamenteve për Ligjin për Parandalimin e Pastrimit të Parave dhe Luftimin e Terrorizmit. Nëpërmjet një reagimi në rrjetet sociale, kreu i ekzekutivit sqaroi se ky hap legjislativ i jep fund plotësimit të kritereve të mbetura, duke i hapur përfundimisht rrugën anëtarësimit të Kosovës në Zonën Unike të Pagesave në Euro (SEPA). Sipas vlerësimeve të paraqitura nga shefi i qeverisë, ky zhvillim do të lehtësojë ndjeshëm procedurat financiare, duke ulur kostot e transfertave bankare dhe duke krijuar lehtësira të prekshme ekonomike për sipërmarrjet, qytetarët dhe diasporën tonë.