Kosova drejt SEPA-s, Kurti falënderon deputetët për miratimin e ligjit kyç

Kryeministri i vendit, Albin Kurti, u ka shprehur mirënjohjen deputetëve të Kuvendit të Kosovës për miratimin në lexim të dytë të paketës së ndryshimeve dhe plotësimeve në Ligjin për Parandalimin e Pastrimit të Parave dhe Luftimin e Terrorizmit. Nëpërmjet një reagimi publik, kreu i ekzekutivit ka vënë inë dukje se ky hap legjislativ i hap rrugë vendit për të përmbushur kriterin përfundimtar drejt anëtarësimit në Zonën e Vetme të Pagesave në Euro (SEPA). Sipas kreut të qeverisë, ky zhvillim do të lehtësojë ndjeshëm kryerjen e transaksioneve financiare me shpenzime minimale, duke ofruar lehtësi të drejtpërdrejta për sipërmarrjet, qytetarët dhe diasporën. Madje, Kurti ka bërë të ditur se përfitimet financiare nga ulja e tarifave të transfertave bankare llogariten në rreth 58 milionë euro çdo vit. “Dua të shpreh falënderimin tim për deputetët që dje votuan në lexim të dytë ndryshim/plotësimin e Ligjit për Parandalimin e Pastrimit të Parave dhe Luftimin e Terrorizmit. Miratimi i këtij ligji i mundëson Kosovës të plotësojë edhe kushtin e fundit për t’u integruar në sistemin evropian të pagesave SEPA (Single Euro Payments Area). Ky integrim mundëson transferta bankare të parave me kosto shumë më të ulët dhe do t’u kursejë qytetarëve, bizneseve e mërgatës sonë rreth 58 milionë euro në vit nga tarifat e reja”, ka theksuar ai në shkrimin e tij. Procesi i integrimit në rrjetin SEPA ka për qëllim thjeshtimin e qarkullimit të valutës euro mes Republikës së Kosovës dhe shteteve anëtare, duke minimizuar shpenzimet e transferimit dhe duke përmirësuar lidhjet ekonomike ndërkombëtare për ekonominë vendase.