Gjiganti bavarez gati marrëveshjen: Harry Kane pritet të lidhë të ardhmen me Bayernin deri në vitin 2029

Sulmuesi kryesor i Bayern Mynihut, Harry Kane, ka gjetur gjuhën e përbashkët me drejtuesit për një marrëveshje të re parimore, e cila parashikon zgjatjen e bashkëpunimit mes palëve deri në përfundim të sezonit 2029. Bazuar në raportimet e mediave ndërkombëtare, zyrtarët e klubit gjerman janë aktualisht në fazën përmbyllëse të përgatitjes së dokumentacionit zyrtar. Ky vendim vjen pasi bomberi anglez dhe familja e tij janë plotësisht të integruar dhe të kënaqur me realitetin e tyre të ri në Mynih. Prej transferimit të tij nga rradhët e Tottenham Hotspur në verën e vitit 2023, lideri i kombëtares së Anglisë është shndërruar në shtyllën kryesore të fazës ofensive të skuadrës nga Allianz Arena. Statistikat e tij flasin qartë për ndikimin e jashtëzakonshëm: në 156 paraqitje zyrtare me fanellën e Bayernit, Kane ka tundur rrjetën 154 herë, duke konfirmuar një efikasitet të frikshëm që nga dita e parë e zbarkimit në Bundesligë. Një konfirmim i tillë përbën një zhvillim tejet pozitiv për ambiciet e klubit gjerman, që synon të sigurojë shërbimet e pykës së tij më të rëndësishme për një afat të gjatë kohor.