Musliu paralajmëron rreziqet ndërkombëtare nga strategjia e Kosovës për Hagën

Zhvillimet e fundit rreth gjykimit në Hagë ndaj ish-presidentit Hashim Thaçi dhe bashkëakuzuarve të tjerë kanë ngritur debate të nxehta në skenën politike vendase, veçanërisht pas hapave të ndërmarrë nga institucionet për t'u përfshirë në mbrojtjen e tyre. Derisa pjesë e politikës insiston në një angazhim më të madh shtetëror, njohësi i fushës juridike nga Belgjika, Skënder Musliu, ngre alarmin se kjo qasje mund t'i kushtojë shtrenjtë vendit në rrafshin ligjor dhe diplomatik. Në një prononcim publik, eksperti juridik ka hedhur poshtë idenë e krahasimit të çështjes së Thaçit me atë të gjeneralit kroat Ante Gotovina, duke vënë anash çdo paralelizëm mes dy rasteve. Musliu ka shprehur hapur pakënaqësinë ndaj përfshirjes së institucioneve kosovare në projektimin e një strategjie mbrojtëse për të pandehurit, duke nënvizuar se interesat e shtetit nuk duhet të vihen në fije të periusë për shkak të fatit individual në Hagë. “Mbrojtja institucionale e Kroacisë dhe Bosnjë-Hercegovinës me atë të Kosovës nuk mund të krahasohet, sepse nuk kanë asgjë të përbashkët. Gjeneralët dhe komandantët e këtyre dy shteteve kanë luftuar në beteja dhe në vijat e para të frontit kundër ushtrisë, paramilitarëve dhe forcave speciale policore të Serbisë, për ta mbrojtur popullatën civile dhe për ta çliruar vendin e tyre. Kurse katër të akuzuarit, siç kanë deklaruar edhe vetë, nuk kanë qenë pjesë e luftës dhe nuk kanë luftuar kundër ushtrisë serbe, por akuzohen për krime lufte kundër popullatës civile”, deklaron Musliu. Sipas vlerësimit të tij, është jetike të bëhet ndarja e qartë midis përgjegjësisë individuale dhe asaj kolektive të strukturave. Ai insiston se procesi pranë Dhomave të Specializuara nuk paraqet aspak një gjykim ndaj Ushtrisë Çlirimtare të Kosovës, por ndaj personave specifikë. “Në Hagë nuk po mbrohet e as nuk po gjykohet UÇK-ja, por individët. Prandaj, gjeneralët dhe komandantët e Kroacisë dhe Bosnjë-Hercegovinës nuk duhet të merren si shembull për të arsyetuar një strategji të njëjtë institucionale në Kosovë”, shprehet ai. Juristi po ashtu ka hedhur kritika ndaj vendimmarrjes së fundit institucionale që ka të bëjë me ndryshimet në Ligjin për Dhomat e Specializuara dhe Zyrën e Prokurorit të Specializuar, si dhe për përpjekjet për ndërtimin e një qasjeje shtetërore në fazën e apelit për të akuzuarit. Këto veprime, paralajmëron ai, mund t'i krijojnë Kosovës ngërçe serioze në bashkëpunimin me aleatët perëndimorë. “Konsideroj se përfshirja e institucioneve të Kosovës në procesin gjyqësor të Hagës paraqet një aventurë të pamatur dhe të rrezikshme, si në planin e brendshëm, ashtu edhe në arenën ndërkombëtare. Nëse Kosova ushtron juridiksion mbi këto Dhoma, atëherë çdo ndërhyrje e institucioneve në proces, sipas vlerësimit tim, mund të konsiderohet nga bashkësia ndërkombëtare si ndërhyrje në administrimin e drejtësisë”, deklaron juristi. Në këtë linjë, ai sugjeron që ekzekutivi kosovar duhet të vijojë ndihmën financiare për mbrojtjen ligjore të të pandehurve, konform normave në fuqi, por njëkohësisht kërkon që kjo të zhvillohet me maturi për të mos rrezikuar partneritetet strategjike. “Qeveria e Kosovës i ka kryer rregullisht obligimet lidhur me pagesat e avokatëve për mbrojtjen juridike të të akuzuarve, duke shpenzuar miliona. Ajo duhet ta vazhdojë këtë ndihmë, por edhe të veprojë në mënyrë diskrete, duke mos i cenuar raportet me partnerët strategjikë”, thekson Musliu. Në fund, ai ka adresuar shqetësimet e tij edhe sa i përket qasjes së autoriteteve ndaj kësaj teme të ndjeshme.