BDI kundër ligjit të VLEN-it: Më mirë pa ligj sesa me një zgjidhje që legalizon diskriminimin

Zëdhënësja e Bashkimit Demokratik për Integrim (BDI), Arta Bilalli-Zendeli, e ftuar në emisionin “N’Dritë”, ka bërë të ditur se subjekti i saj politik nuk do ta votojë propozim-ligjin aktual për përfaqësim të drejtë dhe adekuat. Sipas përfaqësueses së BDI-së, prania e një ligji të tillë në skenën politike është më e dëmshme sesa mosmiratimi i tij fare, pasi dështon në mbrojtjen e interesave të shqiptarëve. “Ky ligj vetëm do ta legjitimon dhe legalizon, modelin e konkurseve 50 me 2, 35 me 0, 27 me 1 dhe kur janë ato konkurse të atilla mund edhe të kritikohen, mund edhe të kërkohet rishqyrim i të njëjtave”, u shpreh ajo. Në fund, Bilalli-Zendeli theksoi rëndësinë e standardeve të mirëfillta ligjore, duke shtuar se: “Por kur do të jenë të bazuara dhe kur do ta kenë mbështetjen në kornizën ligjore të sistemit juridik, atëherë ato do të jenë pjesë e përditshmërisë tonë”.