Kriza Uashington-Kiev shtohet, Trump: Bashkëpunimi me Zelenskyn më i vështirë se ai me Putinin

Përplasjet mes Shteteve të Bashkuara dhe Ukrainës kanë shënuar një tjetër nivel tensioni, ndërkohë që kreu i shtetit ukrainas po kërkon mbështetjen e partnerëve evropianë në kuadër të samitit të Bashkimit Evropian që po zhvillohet në Bruksel. Gjatë kësaj vizite, Zelensky zhvilloi bisedime me Sekretarin e Përgjithshëm të NATO-s, Mark Rutte, si dhe një sërë takimesh kokë më kokë me personalitete të larta të politikës evropiane. “Të gjithë ne në Evropë duam që kjo luftë të përfundojë. Dhe që kjo të ndodhë, nevojiten sinjale të forta, më shumë presion real ndaj Rusisë dhe më shumë mbështetje mbrojtëse për Ukrainën”, deklaroi Zelensky, duke vënë theksin te nevoja urgjente për një front të përbashkët evropian për të garantuar sigurinë e popullsisë civile ukrainase. Këto zhvillime vijnë në një kohë kur Kievi zyrtar ka bërë të qartë se nuk do t'i përmbahet më kërkesës së administratës amerikane për të pezulluar sulmet ndaj infrastrukturës energjetike ruse. Marrëdhëniet mes dy vendeve u ftohën ndjeshëm javën e kaluar, pas vendimit të Trump për të zbutur masat ndëshkimore kundër Moskës, me kushtin që ajo të furnizojë tregjet ndërkombëtare me vëllime të mëdha nafte. Pakënaqësia në Kiev është thelluar më tej edhe për shkak të bllokimeve në sistemin e avancuar satelitor amerikan, një ndërprerje që ka vështirësuar ndjeshëm operacionet e forcave ukrainase në terren. Nga ana e tij, udhëheqësi i Shtëpisë së Bardhë i ka quajtur të papranueshme rifillimin e sulmeve ndaj rafinerive ruse, duke e fajësuar udhëheqjen ukrainase për ndikim negativ në kostot globale të energjisë. “Është më e vështirë të punosh me Zelenskyn sesa me Putinin”, u shpreh Trump, duke shtuar se homologu i jo ukrainas nuk po tregon vullnet real për paqe. “Ai thotë se po, por në realitet nuk po e bën”, përfundoi presidenti amerikan. Ky reagim erdhi pas sulmit me dron të ndërmarrë nga Ukraina ndaj një rafinerie në zonën e Ryazanit në Rusi, incidenti i parë i këtij lloji që prej njoftimit të bërë të dielën nga Trump se Kievi dhe Moska kishin rënë dakord për një armëpushim në sektorin energjetik.