Nën lupën e SPAK: Ish-ministrja Olta Xhaçka dhe bashkëshorti i saj përballen zyrtarisht me akuza të rënda

Prokuroria e Posaçme Kundër Korrupsionit dhe Krimit të Organizuar ka regjistruar procedim penal ndaj ish-ministres së Jashtme dhe të Mbrojtjes, Olta Xhaçka, e cila tashmë është zyrtarisht nën hetim. Sipas informacioneve të siguruara nga gazetarja Klodiana Lala, deputetja e Partisë Socialiste akuzohet për përfshirje të mundshme në veprat penale të korrupsionit dhe pastrimit të produkteve të veprës penale. Ky zhvillim vjen vetëm dy ditë pasi Xhaçka u paraqit në ambientet e SPAK-ut, ndërkohë që nën hetim ndodhet edhe bashkëshorti i saj, Artan Gaçi. Hetimet drejtohen nga prokurorët Ols Dado dhe Altin Dumani, të cilët kanë siguruar prova të reja ndaj çiftit përmes një letër-porosie të mbërritur nga shtetet e Bashkimit Evropian. Materialet e siguruara flasin për dyshime mbi korrupsionin në lidhje me individë të tretë, si dhe për pastrim parash që dyshohet se është kryer përmes sipërmarrjeve të Artan Gaçit, i cili mban statusin e investitorit strategjik. Për të zbardhur plotësinë e kësaj çështjeje, grupi hetimor ka sekuestruar dokumentacionin përkatës, ka analizuar transaksionet bankare dhe ka marrë në pyetje dëshmitarë e persona të tjerë të përfshirë.