Goditje shpërndarjes së drogës pranë shkollave në Vlorë: Kapet me doza kokaine dhe kundërshton efektivët, prangoset 17-vjeçari

Një 17-vjeçar është arrestuar në flagrancë nga forcat e rendit në qytetin e Vlorës, pasi u kap me doza lënde të dyshuar narkotike të llojit kokainë. I mituri, i cili dyshohet se e posedonte lëndën me qëllim tregtimin e saj, është prangosur në afërsi të një institucioni arsimor. Aksioni është zhvilluar nga Seksioni për Hetimin e Narkotikëve pranë Drejtorisë Vendore të Policisë Vlorë, në vijim të kontrolleve intensive të operacionit të koduar “Shkolla të pastra”. Ndalimi i të riut u realizua në lagjen “Pavarësia”, si rezultat i administrimit të shpejtë të informacioneve të siguruara në rrugë operative. Gjatë momentit të ndalimit, i riu ka bërë rezistencë duke kundërshtuar punonjësit e policisë së rendit. Gjithsesi, gjatë kontrollit fizik të ushtruar ndaj tij, shërbimet policore gjetën dhe sekuestruan në cilësinë e provës materiale dozat e kokainës. Pas përfundimit të veprimeve të para procedurale, materialet i kaluan Prokurorisë së Vlorës për ndjekje të mëtejshme, ndërsa 17-vjeçari akuzohet për veprat penale “Prodhimi dhe shitja e narkotikëve” dhe “Kundërshtimi i punonjësit të policisë së rendit publik”. Nga ana e saj, Policia e Vlorës konfirmon se do të vijojë me kontrolle të rrepta dhe veprime hetimore pranë mjediseve arsimore, me synim parandalimin dhe goditjen e veprimtarive kriminale që lidhen me lëndët narkotike.