Skenderaj nderon sot figurën e heroit Idriz Rrecaj: Publikohet agjenda e ceremonisë së rivarrimit

Komuna e Skenderajt do të organizojë sot një sërë aktivitetesh përkujtimore në nderim të jetës, veprës dhe sakrificës sublime të heroit Idriz Rrecaj. Me këtë rast, me nderime të larta shtetërore e kombëtare, do të zhvillohet edhe ceremonia e lamtumirës së fundit dhe rivarrimit të mbetjeve të tij mortore. Idriz Rrecaj ishte pjesë e të ashtuquajturit “Grupi i Intelektualëve”, pjesëtarët e të cilit ranë martirë gjatë periudhës së luftës. Eshtrat e heroit u identifikuan së fundmi, pasi u zbuluan në një varrezë masive në territorin e Zubin Potokut. Sipas protokollit zyrtar, ngjarjet përkujtimore do të zhvillohen sipas kësaj agjende: Në orën 12:00, në Shtëpinë e Kulturës “Hasan Prishtina” në Skenderaj, do të mbahet Akademia Përkujtimore. Më pas, nga ora 13:00 deri në orën 15:00, qytetarët dhe drejtuesit institucionalë do të mund të kryejnë homazhe pranë arkivolit të heroit në Palestrën Sportive “Ilaz Kodra” në Skenderaj. Në përmbyllje të aktiviteteve, në orën 16:00 do të zhvillohet ceremonia e varrimit në Varrezat e Dëshmorëve në fshatin Marinë.