Sistemi i fuqishëm anti-tank Javelin pritet të arrijë në Kosovë brenda këtij viti, konfirmon ministri Maqedonci

Ministri i Mbrojtjes, Ejup Maqedonci, ka bërë të ditur se Forca e Sigurisë së Kosovës është në pritje të pranimit të një sasie të sistemeve anti-tank Javelin nga Shtetet e Bashkuara të Amerikës gjatë këtij viti. Sipas tij, ky furnizim ishte zotuar që gjatë vitit të kaluar, ndërsa arsyetoi se tejkalimi i afateve ka ndodhur për shkak të angazhimeve ushtarake të SHBA-së në disa rajone të botës dhe mbështetjes së vazhdueshme që Washingtoni i ka siguruar Ukrainës. Duke folur gjatë një paraqitjeje televizive, Maqedonci theksoi se procesi gjendet në fazën përfundimtare dhe se autoritetet janë në bisedime për të siguruar dërgesën gjatë muajve në vijim, duke shtuar se edhe shtete të tjera, përfshirë Shqipërinë pas një periudhe pesëvjeçare, i kanë pranuar pajisjet e tyre këtë vit. I pyetur për kapacitetet ekzistuese, ai sqaroi se Ushtria e Kosovës tashmë posedon tri kategori të ndryshme të armatimit anti-tank, ku përfshihet një sistem i ngjashëm me Javelin, një tjetër i siguruar përmes blerjes nga Republika e Gjermanisë si dhe një sistem i ri turk. Gjatë kësaj interviste, kreu i mbrojtjes shtetërore trajtoi edhe çështjen e sigurimit të helikopterëve “Black Hawk” nga SHBA-ja, duke konfirmuar se po vijojnë procedurat dhe përgatitjet teknike, mes të cilave edhe ngritja e hangarëve adekuatë. Kujtojmë se shteti amerikan kishte aprovuar zyrtarisht kërkesën e Kosovës për shitjen e sistemit modern anti-tank Javelin në muajin janar të vitit 2024.