Skenderaj përcjell në banesën e fundit heroin Idriz Rrecaj, sot homazhe dhe ceremoni shtetërore

Komuna e Skenderajt bëhet gati sot për t'i dhënë lamtumirën e fundit heroit Idriz Rrecaj, përmes një sërë organizimesh solemne dhe ceremonisë mortore që vijnë në shenjë respekti për jetën, sakrificën dhe trashëgiminë e tij të lënë në shërbim të vendit. Axhenda e aktiviteteve përkujtimore nis në orën 12:00 me mbajtjen e akademisë solemne, e cila do të zhvillohet në mjediset e Shtëpisë së Kulturës “Hasan Prishtina” në qytetin e Skenderajt. Më pas, nga ora 13:00 deri në orën 15:00, qytetarët dhe figura publike do të kenë mundësinë të bëjnë homazhe pranë arkivolit, në Palestrën Sportive “Ilaz Kodra”. Ndërkohë, ceremonia e varrimit është caktuar të mbahet në orën 16:00, ku eshtrat e tij do të prehen përgjithmonë në Varrezat e Dëshmorëve në Marinë. Idriz Rrecaj ishte pjesë e viktimave të njohura si “Grupi i Intelektualëve”, ndërsa mbetjet e tij mortore u zbuluan kohët e fundit brenda një varreze masive të lokalizuar në Zubin Potok.