Përplasja institucionale për Lojërat Mesdhetare 2030, ministri Gashani i kundërpërgjigjet ashpër kryetarit Rama

Ministri i Sportit dhe Rinisë, Blerim Gashani, ka reaguar ndaj kryetarit të Komunës së Prishtinës, Përparim Rama, pas deklaratave të këtij të fundit se Kosova rrezikon t'i humbasë Lojërat Mesdhetare 2030. Kryetari i Prishtinës, Përparim Rama, përmes një postimi në profilin e tij në Facebook, kishte ngritur shqetësimin se vendi ndodhet në prag të humbjes së këtij organizimi të madh sportiv, duke iu referuar një konfirmimi nga Komiteti Ndërkombëtar i Lojërave Mesdhetare (ICMG) për mungesë të përgjigjeve institucionale. Sipas Ramës, megjithëse Prishtina i ka fituar lojërat dhe ka përcaktuar projektet e lokacionet e votuara në Asamblenë e Kryeqytetit, radha i ka mbetur Qeverisë qendrore dhe Komitetit Organizativ, në krye të të cilit kryeministri Albin Kurti ka vendosur vetveten. Ai kishte shtuar se ICMG më 19 dhjetor do të shqyrtojë situatën përmes një Asambleje të Jashtëzakonshme, duke e quajtur këtë situatë si humbjen më të madhe për qytetarët e Kosovës. Në kundërpërgjigjen e tij të publikuar gjithashtu në rrjetet sociale, ministri Blerim Gashani e ka cilësuar qasjen e kryetarit Rama si problematike, duke thënë se ai ka shpërndarë vetëm një pjesë të korrespondencës me ICMG-në, duke krijuar një dramaticitet të panevojshëm dhe alarm të pabazë. Gashani ka shtuar se çështjet mes institucioneve partnere duhet të trajtohen përmes kanaleve zyrtare dhe jo përmes teatralitetit publik në Facebook. Duke folur në cilësinë e përfaqësuesit të Qeverisë së Republikës së Kosovës dhe anëtarit të Bordit Organizativ, Gashani ka ritheksuar se përkushtimi për realizimin e këtij eventi mbetet i plotë dhe i palëkundur. Ai ka theksuar se puna po vazhdon me seriozitet në bashkëpunim me ICMG-në dhe partnerët e tjerë për të përmbushur të gjitha afatet, ndërsa vështirësitë po trajtohen pa zhurmë dhe pa ankesa. Në fund të reagimit të tij, ministri Gashani ka garantuar se Qeveria e Kosovës do të jetë mbështetëse e këtij projekti madhor, duke siguruar qytetarët se Kosova do t'organizojë me sukses Lojërat Mesdhetare 2030.