80-vjetori i akademik Hivzi Islamit, Shiroka Pula: Veprat e tij, gurthemel i trashëgimisë sonë shkencore

Presidentja e Kosovës, Justina Shiroka Pula, mori pjesë këtë të enjte në ngjarjen solemne të promovimit të dy botimeve të reja shkencore të akademik Hivzi Islamit, të titulluara “Kosova-transicioni i fundit demografik në Evropë” dhe “Studime demografike dhe sociologjike për Kosovën dhe shqiptarët”, ngjarje kjo e organizuar në kuadër të kremtimit të 80-vjetorit të lindjes së tij. Gjatë fjalës së saj, ajo theksoi se këto dy vëllime shkencore mishërojnë një pjesë thelbësore të krijimtarisë së gjatë të akademikëve dhe kontributit të tij të çmuar në analizimin e popullsisë së Kosovës dhe të mbarë kombit shqiptar. “Në historinë e çdo institucioni shkencor ka personalitete që nuk dallohen vetëm për veprat që kanë shkruar, por edhe për gjurmët që kanë lënë në zhvillimin e vetë institucionit, në formimin e brezave të rinj dhe në afirmimin e shkencës në hapësirën kombëtare e ndërkombëtare. Një personalitet i tillë është pa dyshim akademik Hivzi Islami”, u shpreh ajo. Duke ndarë kujtime nga bashkëpunimi i gjatë, ajo vuri në dukje se kjo ditë mbart një domethënie të veçantë për të, pasi si kolege prej shumë vitesh ka dëshmuar nga afër seriozitetin e tij profesional, përkushtimin e palodhur, përgjegjësinë e lartë institucionale dhe përpjekjet e vazhdueshme për të ruajtur e ngritur autoritetin e Akademisë. “Një ndër meritat e tij të veçanta është institucionalizimi i demografisë si disiplinë shkencore dhe universitare në Kosovë. Ai organizoi studimet pasuniversitare në këtë fushë dhe kontribuoi drejtpërdrejt në përgatitjen e brezave të studiuesve të rinj, shumë prej të cilëve vazhduan rrugën e tyre akademike e shkencore”, pohoi Shiroka Pula. Presidentja Shiroka Pula tërhoqi vëmendjen gjithashtu te sfidat e mprehta aktuale demografike dhe socio-ekonomike me të cilat përballet Kosova, duke përfshirë shpërnguljen e qytetarëve, largimin e forcës së re punëtore, transformimet në strukturën e moshave, rënien e shkallës së lindshmërisë, si dhe pasojat e këtyre dukurive në tregun e punës, ekonominë dhe perspektivën afatgjatë të shtetit. Sipas saj, ky jubile nuk përbën thjesht një mundësi për të vlerësuar arritjet ndër vite të akademik Hivzi Islamit, por është edhe një dëshmi e qartë se trashëgimia e tij shkencore dhe akademike do të mbetet përgjithmonë shtyllë e rëndësishme për Kosovën. Akademik Hivzi Islami njihet gjerësisht si një ndër arkitektët e demografisë moderne shqiptare dhe ndër hulumtuesit më të shquar të dinamikave të popullsisë në vend dhe rajon. Ai ka pasuruar fushën akademike me disa libra shkencorë dhe mbi 150 punime e artikuj të botuar në revista prestigjioze brenda dhe jashtë vendit.