Përmbysje spektakolare në “Wembley”: Anglia e ndez ndeshjen ndaj Spanjës për vetëm katër minuta

Përballja mes Anglisë dhe Spanjës ka përmbushur çdo pritshmëri, duke dhuruar një spektakël të vërtetë futbollistik në 45 minutat e para të zhvilluara në stadiumin “Wembley”, ku skuadrat kanë zbritur në dhomat e zhveshjes me shifrat 2-1 në favor të “Tre Luanëve”. Ndonëse kampionët aktualë të botës e nisën sfidën në mënyrën më të mirë të mundshme duke kaluar në epërsi që në sekondat e para, vendasit reaguan fuqishëm para mbylljes së fraksionit të parë. Kthesa e ndeshjes nisi që në minutën e dytë, kur një pakujdesi e rëndë e mbrojtësit Marc Guehi u shfrytëzua në maksimum nga Lamine Yamal. Talenti spanjoll nuk fali para portierit James Trafford, duke zhbllokuar shpejt rezulatatin. Spanjollët vazhduan të dominonin dhe rrezikuan sërish në minutën e 9-të me Ferran Torres, i cili dërgoi topin në rrjetë pas një krosimi nga goditja e dënimit e ekzekutuar nga Fabian Ruiz, por gjuajtja u anulua për pozicion jashtë loje. Torres pati edhe dy mundësi të arta për të dyfishuar avantazhin në minutën e 16-të dhe të 27-të, por pa sukses përballë portierit anglez. Gjatë kësaj periudhe, anglezët kërkuan një penallti në minutën e 30-të pas rrëzimit të Myles Lewis-Skelly në zonë, megjithatë gjyqtari zgjodhi të vazhdojë lojën. Momenti i kthesës për Anglinë erdhi në minutën e 36-të, falë një kundërsulmi të shkëlqyer të finalizuar në mënyrë perfekte nga Anthony Gordon, i cili u shërbye në mënyrë ideale nga Jude Bellingham.

Vrulli i anglezëve nuk u ndal me kaq, pasi vetëm katër minuta më vonë, në minutën e 40-të, ata arritën përmbysjen e plotë. Pas një krosimi të Nico O’Reilly dhe goditjes me kokë të Harry Kane, topi u devijua fatkeqësisht nga Marc Cucurella drejt portës së tij. Spanjollët iu afruan sërish golit në sekondat e fundit të pjesës së parë, kur një harkim i Cucurella u ndal nga shtylla, duke vulosur përfundimisht rezultatin 2-1 të kësaj pjese të parë.