Eksperti italian paralajmëron: Virgil van Dijk përfundimisht do të vishet kuqezi

Gazetari i njohur italian, Carlo Pellegatti, është i bindur se mbrojtësi i mirënjohur Virgil van Dijk herët a vonë do t’i bashkohet gjigantit italian, Milan, pavarësisht vendimit të tij për të vazhduar qëndrimin te Liverpooli gjatë afatit kalimtar të verës. Qendërmbrojtësi holandez ishte në prag të largimit nga “Anfield” disa muaj më parë, pasi kontrata e tij po shkonte drejt fundit. Sipas raportimeve të kaluara, ai kishte shprehur preferencën për një kalim te “San Siro” dhe madje kishte dakordësuar kushtet personale me klubin milanez, para se të vendoste përfundimisht të mbante shiritin e kapitenit te “Reds” pas një edicioni sfidues. Aktualisht në moshën 35-vjeçare, Van Dijk mbetet ende një emër i lakuar dhe në vëmendjen e strukturave drejtuese. Duke folur në kanalin e tij zyrtar në YouTube, Pellegatti kujtoi se kritikat që merr për këtë parashikim janë të ngjashme me dyshimet që ekzistonin përpara transferimit historik të Zlatan Ibrahimovic. “Vazhdoj të besoj se Gerry Cardinale e ka bërë të qartë qasjen e tij: ose do ta sigurojmë menjëherë përmes një dëmshpërblimi, ose do ta marrim vitin e ardhshëm me parametër zero. Unë kam insistuar se Van Dijk do të zbarkojë te Milani herët apo vonë. Koha do të tregojë nëse pronari do të ndryshojë qëndrim, por ju siguroj se ky nuk është një lajm i fabrikuar nga hiçi”, u shpreh ndër të tjera gazetari. Liverpooli kishte investuar plot 85 milionë euro në janar të vitit 2018 për ta shkëputur holandezin nga radhët e Southamptonit, një lëvizje që u shpagua plotësisht pasi ai u shndërrua në një prej ikonave më të mëdha në historikun e klubit anglez. Gjatë kësaj periudhe, lojtari ka regjistruar 380 paraqitje zyrtare, duke realizuar 36 gola nga pozita e mbrojtësit dhe duke dhuruar 16 asistime për bashkëlojtarët e tij. Për më tepër, ky rrugëtim i jashtëzakonshëm i ka sjërë atij sukses maksimal, duke fituar dy herë Premierligën, Ligën e Kampionëve, Superkupën e Evropës, Kupën e Botës për Klube, FA Cup, si dhe dy trofe të EFL Cup.