Përfundon mandati i diplomates Heleni Vakali në krye të Zyrës Greke në Prishtinë

Ambasadorja Heleni Vakali ka përmbyllur misionin e saj diplomati si drejtuese e Zyrës Ndërlidhëse Greke në Republikën e Kosovës. Gjatë këtij momenti përmbyllës, ajo ka përcjellë një mesazh falënderimi për qytetarët kosovarë, duke vlerësuar lart ngrohtësinë, mikpritjen dhe partneritetin e treguar përgjatë kohës së shërbimit të saj, e cila kishte nisur në prill të vitit 2022. “Me përfundimin e mandatit tim në Kosovë, dëshiroj t’u shpreh mirënjohjen time qytetarëve të Kosovës për mikpritjen, për nderin që më bënë me miqësinë e tyre dhe për gatishmërinë e vazhdueshme për të zhvilluar diskutime të hapura dhe bashkëpunim të frytshëm”, ka deklaruar ndër të tjera diplomatja greke, duke shtuar se ka shpresa dhe besim të plotë se rrugët e tyre do të kryqëzohen sërish në të ardhmen. Në kuadër të vizitave lamtumirëse, gjatë ditëve të fundit, ambasadorja Heleni Vakali ka zhvilluar takime zyrtare me personalitetet e larta të shtetit, duke u takuar me zëvendëskryeministrin e parë dhe ministrin e Punëve të Jashtme dhe Diasporës, Glauk Konjufca, si dhe me kryetaren e Kuvendit, Albulena Haxhiu. Gjatë këtyre takimeve, palët kanë shkëmbyer mendime rreth zhvillimeve aktuale, marrëdhënieve dypalëshe dhe mundësive për të thelluar bashkëpunimin ndërmjet dy vendeve.