Mbrojtja e ish-krerëve të UÇK-së në Hagë, Nagavci paralajmëron funksionalizimin e grupit punues javën e ardhshme

Kryetarja e Grupit Parlamentar të Lëvizjes Vetëvendosje, Arbërie Nagavci, ka bërë të ditur se brenda fillimit të javës që vjen pritet të bëhet funksionalizimi i plotë i grupit punues, i cili do të angazhohet për mbrojtjen e ish-krerëve të UÇK-së në shkallën e dytë të Apelit në Hagë. Edhe pse Lëvizja Vetëvendosje nuk e ka zyrtarizuar ende emrin e ligjvënësit që do ta përfaqësojë në këtë strukturë, Nagavci ka garantuar se përzgjedhja do të bëhet mbi bazën e përvojës dhe profesionalizmit. "Vlerësojmë se vendimi i Qeverisë për themelimin e këtij grupi punues është tejet i rëndësishëm. Deputeti që do të delegojmë do t'i përgjigjet plotësisht detyrës, ndonëse emrin ende nuk e kemi vendosur. Besoj se më së largu deri në fillim të javës së ardhshme ky proces do të përmbyllet", ka theksuar ajo. Sipas saj, një peshë të veçantë ka edhe fakti se ky mekanizëm do të drejtohet nga kryediplomati Glauk Konjufca, ndërsa shprehu bindjen se puna e anëtarëve do të shoqërohet me bashkëpunim dhe dakordësi të plotë. "Më tej, është tejet e rëndësishme që do të kemi të bëjmë me një grup multidimensional dhe nuk kam asnjë dyshim se do të mbretërojë një pajtueshmëri e plotë mes të gjithë anëtarëve të tij", ka shtuar ajo.