Prishtina ndizet: Termokos nis zyrtarisht sezonin e ngrohjes për mbi 25 mijë familje

Ndërmarrja publike “Termokos” ka konfirmuar zyrtarisht fillimin e sezonit të ngrohjes 2026/2027 për kryeqytetin, duke bërë të mundur që nga dita e sotme, 15 tetor, mbi 25 mijë konsumatorë të kenë ngrohje në banesat dhe objektet e tyre. Pas një procesi të detajuar të vlerësimit të infrastrukturës dhe përgatitjeve teknike, kryeshefi ekzekutiv i Termokosit, Bersant Beka, në bashkëpunim me ekipin menaxhues, ka dhënë dritën jeshile për startin e sezonit. Ky vendim është marrë në përputhje të plotë me kërkesat ligjore dhe duke marrë parasysh ndryshimet e temperaturave klimatike. Në njoftimin zyrtar bëhet e ditur se gjatë periudhës së fundit janë finalizuar të gjitha procedurat e nevojshme, përfshirë nënshkrimin e marrëveshjes për furnizim me energji termike me Korporatën Energjetike të Kosovës (KEK). Ky proces është zhvilluar në koordinim të ngushtë edhe me autoritetet e Komunës së Prishtinës. Për të siguruar mbarëvajtjen e sistemit dhe për të mbrojtur pajisjet teknike nga ndonjë ngarkesë e papritur, “Termokos” ka njoftuar se shpërndarja e ngrohjes do të fillojë me kapacitete të kufizuara. Ky furnizim do të intensifikohet gradualisht derisa të arrihet stabilizimi i plotë i sistemit për të gjithë përdoruesit e rrjetit.