Enver Hoxhaj: Protestat për UÇK-në po shkruajnë një kapitull të ri të patriotizmit kosovar

Deputeti i Partisë Demokratike të Kosovës, Enver Hoxhaj, ka vlerësuar se protestat e vazhdueshme në mbështetje të Ushtrisë Çlirimtare të Kosovës po ndërtojnë një vetëdije dhe frymë krejtësisht të re patriotike brenda shoqërisë sonë. Gjatë një interviste të dhënë së fundmi, ai ka theksuar se angazhimi masiv i qytetarëve, ku spikasin moshat e reja por edhe ato të shtyra, dëshmon solidaritetin e thellë dhe lidhjen e pashkëputshme me të kaluarën tonë historike. "Kur i shohim njerëzit duke dalë çdo ditë në protestë, sidomos të rinjtë dhe të moshuarit. Kjo ngjarje prodhon një vetëdije të re, ndërsa vetëdija e re prodhon një vetëbesim të ri", ka u shpreh ndër të tjera Hoxhaj. Politikani kosovar është shfaqur tejet optimist se vendi ynë do t'ia dalë mbanë kësaj sfide, duke u shndërruar në një shoqëri edhe më të qëndrueshme, ndërsa ka shfaqur bindjen e plotë se drejtësia do të triumfojë edhe në shkallën e Apelit. "Ne mund të dalim prej kësaj situate edhe si shoqëri më e fortë. Jo vetëm ta fitojmë Apelin, por të dalim edhe më të fortë nga kjo betejë. Situata të tilla, në fakt, krijojnë vetëbesim", shtoi ai. Duke iu drejtuar shtresës së re të shoqërisë që nuk ka pasur fatin e hidhur të përjetimit të sundimit të huaj, ligjvënësi u bëri thirrje që këtë valë mobilizimi ta perceptojnë si një testament bashkëkohor të atdhedashurisë. "Ata që janë të rinj dhe nuk e dinë se çfarë do të thotë të jetosh në robëri, por kanë dëgjuar vetëm nga gjeneratat e tjera, duhet ta shohin këtë angazhim si një testament të ri në raport me atdhedashurinë", u shpreh ai. Në fund, Hoxhaj ka përsëritur ftesën e hapur drejtuar mbarë qytetarëve që t'i përgjigjen pozitivisht thirrjes për marshim më 1 tetor, duke vënë theksin te nevoja e ruajtjes së dinjitetit dhe vlerave të luftës çlirimtare. "Po shoh se këtu po krijohet një ndjenjë e re e patriotizmit. Ftoj secilin që më 1 tetor t’i bashkohet këtij marshi. Sa më shumë që të mobilizohemi, të jemi solidarë, ta duam Ushtrinë Çlirimtare të Kosovës dhe ta mbrojmë dinjitetin tonë, aq më shumë duhet të bindemi se ajo që na e solli lirinë është gjëja dhe vlera jonë më e shenjtë", deklaroi ai. Duke përmbyllur fjalën e tij, ish-ministri i Jashtëm përmendi faktin se pavarësisht betejave dhe personaliteteve të shumta ndër shekuj, vetëm epopeja e UÇK-së solli kurorëzimin e ëndrrës për shtetësi dhe liri. "Kemi pasur luftëra, udhëheqës, beteja dhe epoka të lavdishme, por në këta dy mijë vjet vetëm njëra ka rezultuar me shtet, me çlirim dhe me pavarësi. Ishte një luftë në të cilën patëm fatin t’i kishim edhe aleatët tanë", përfundoi Hoxhaj.