Egnatia në prag të duelit evropian, Dede dhe Aleksi: Jemi gati për sfidën me danezët e Midtjylland

Kampionët e Egnatias janë gati për sfidën e madhe evropiane që do të luhet nesër në mbrëmje kundër skuadrës daneze Midtjylland, e vlefshme për raundin e parë të Ligës së Konferencës. Ndeshja do të zhvillohet në stadiumin “Air Albania” dhe do të nisë zyrtarisht në orën 18:45. Në prag të këtij takimi delikat, trajneri Nevil Dede dhe kapiteni i skuadrës, mbrojtësi Albano Aleksi, kanë dalë para mediave për të ndarë pritshmëritë e tyre. “I gjithë fokusi ynë është te ndeshja e nesërme, sepse luajmë ndaj një kundërshtari realisht shumë të fortë, i cili prej vitesh nuk aktivizohet vetëm në Ligën e Konferencës, por edhe në Ligën e Kampionëve dhe Ligën e Evropës. Duhet t’i marrim sfidat një nga një dhe shpresojmë që, deri në fund të fazës, të bëjmë më të mirën e mundshme dhe të grumbullojmë sa më shumë pikë për të ecur më tej”, u shpreh kapiteni Aleksi. Nga ana e tij, tekniku Nevil Dede ka theksuar rëndësinë e besimit te forcat e grupit, duke mos e fshehur optimizmin përpara kësaj përballjeje. “Ne duhet të jemi të vetëdijshëm për kapacitetin dhe cilësitë tona. Kjo është gjëja më e rëndësishme. Por nuk besoj se diferencat janë të mëdha, e përmenda dhe do ta përmend me forcë: ne duhet të kuptojmë se ku ndodhemi dhe mbi të gjitha çfarë kërkojmë nga vetja. Pra, ambicia jonë sportive nuk do të ndalojë kurrë. Se sa do t’ia dalim dhe sa të fortë janë kundërshtarët, unë mendoj se fusha e lojës do ta tregojë këtë”, u shpreh trajneri Nevil Dede.