Nga rrugët e Nju Jorkut te Përfaqësuesja e SHBA-së: E fshehta e suksesit të talentit shqiptar Adri Mehmeti

Mesfushori 17-vjeçar i New York Red Bulls, Adri Mehmeti, po shkruan faqet e para të një karriere premtuese në futbollin amerikan, duke u shndërruar në një nga prurjet më interesante të gjeneratës së re, një rrugëtim ky i vënë në pah edhe nga shtypi i njohur amerikan. Vetëm pak kohë më parë, talenti me origjinë shqiptare regjistroi debutimin e tij me kombëtare e Shteteve të Bashkuara (USMNT), duke dalë fitues në tri ndeshje miqësore. Megjithatë, pas këtij suksesi fshihet një histori e gjatë mundimesh dhe sakrificash familjare që ka nisur në Shqipëri e ka lëshuar rrënjë në metropolin e Nju Jorkut. Prindërit e tij i përkasin komunitetit të emigrantëve shqiptarë. Babai, Van Mehmeti, mbërriti në tokën amerikane në moshën 21-vjeçare, duke lënë pas vendlindjen me synimin për të nisur një kapitull a jetë më të mirë. Ai u vendos si një i ri i palodhur, i vendosur për të themeluar një familje, dhe gjatë jetës në SHBA u njoh me bashkëshorten e tij, gjithashtu me rrënjë shqiptare. Menjëherë pas kurorëzimit në martesë, Vani i shprehu dëshirën bashkëshortes për të ndërtuar një familje të shëndetshme dhe për të rritur fëmijë që do t'i kushtoheshin futbollit. Kur Adri erdhi në jetë në një spital të Nju Jorkut, babai i tij kishte vendosur rreth krevatit të porsalindurit plot 50 topa futbolli, ndërsa lodrat do të vinin më vonë, siç rrëfen ai vetë për mediat amerikane. Lidhja e Vanit me këtë sport nuk vjen nga një e kaluar prej lojtari profesionist, por nga pasioni i zjarrtë i një prindi që e shndërroi dëshirën e tij në një mision jete. Duke parë te futbolli mundësinë më të mirë për të ardhmen e djalit në vendin e ri, familja u vendos në Staten Island kur Adri ishte vetëm dy vjeç, ku Vani ndërhyri në oborr duke hequr një pjesë të gardhit dhe ngritur një mur betoni që i biri të stërvitej pa ndalur. Ky ambient në oborrin e shtëpisë mori nofkën “Mini Maracanã”. Gjatë periudhës nga mosha 5 deri në 12 vjeç, Adri kreu aty afërsisht 1.5 milionë prekje topi, duke realizuar nga treqind pasime me të dyja këmbët dy herë në ditë, krahas sfidave një kundër një me të atin. “Nëse bën atë punë në atë moshë, si nuk do t’ia dalësh?”, shprehet Vani, i cili nuk funksionoi thjesht si një prind shoqërues, por u shndërrua në trajnerin e parë, shokun e skuadrës dhe burimin kryesor të disiplinës së hekurt. Kur mbërriti ftesa nga akademia e New York Red Bulls, seancat stërvitjesh zhvilloheshin në Whippany të New Xhersit, një distancë prej 45 minutash udhëtim në secilën anë. Në të njëjtën kohë, familja u shtua edhe me një vajzë, çka bëri që Vani – drejtues i një biznesi transporti – të punonte me orare të zgjatura ditën e natën, duke fjetur vetëm katër orë për t'i mundësuar djalit vajtjen në stërvitje dhe bisedat motivuese pas tyre. Përkushtimi dhe sakrificat më në fund dhanë frytet e tyre. Në momentin kur Adri shënoi golin e tij të parë në MLS, i ati ndodhej në stadiumin e Miamit, ndërsa përqafimi i tyre emocional u shndërrua në simbol të këtij rrugëtimi të gjatë. “E gjithë familja dhe të afërmit që kanë sakrifikuar për mua – pa ta, unë nuk do të isha këtu”, u shpreh Adri pas paraqitjes së tij të parë me kombëtaren e SHBA-së. Pavarësisht kësaj, i riu mbetet i hapur dhe i kualifikueshëm edhe për ngjyrat kuqezi të Shqipërisë, pasi më parë ka mbajtur veshur edhe fanellën e kombëtares U-15. “Ne nuk harrojmë nga vijmë”, thekson Vani. Megjithatë, ai shton: “Por ky vend më ka dhënë gjithçka. Adri do të vendosë vetë. Nëse ai është i lumtur, ne jemi njëqind mijë herë më të lumtur”. Historia e Adri Mehmetit mbetet dëshmia më e qartë se si talenti lulëzon falë mundit dhe sakrificave të heshtura të një familjeje emigrante shqiptare në Amerikë.