Real Madridi merr frymë lirshëm: Kylian Mbappe shmang dëmtimin e rëndë dhe mësohet koha e rikthimit

Sulmuesi yll i Real Madridit, Kylian Mbappe, i ka shpëtuar një dëmtimi të rëndë fizik dhe pritet të mungojë në fusha për rreth dy javë, konfirmimi zyrtar ka ardhur nga vetë klubi spanjoll përmes një njoftimi në faqen e tyre zyrtare, ku bëhet e ditur se ai është diagnostikuar me hiperekstension të gjurit. Prania e francezit mbetet në pikëpyetje për sfidën e ardhshme kampionale kundër Villarrealit, mirëpo ai llogaritet të jetë plotësisht i gatshëm dhe në dispozicion për superderbin e madh ndaj Barcelonës, i njohur si “El Clásico”, i cili do të zhvillohet më 25 tetor. Ky zhvillim përbën një lehtësim të madh për shtabin teknik dhe drejtuesit e Real Madridit, duke marrë parasysh se shqetësimet e tij shëndetësore dukeshin mjaft alarmante në momentin kur ylli i ofensivës u detyrua të lërë fushën e blertë gjatë angazhimit të tij me Kombëtaren e Francës kundër Turqisë. Incidenti ndodhi në minutën e 54-të të takimit, pikërisht në aksin ku ai realizoi golin e vetëm për “Gjelat”, ndërsa pesë minuta më vonë, në minutën e 59-të, u zëvendësua përfundimisht nga Desire Doue. Gjatë këtij sezoni futbollistik, shënuesi i njohur ka arritur të regjistrojë tashmë tetë gola në total duke llogaritur të gjitha garat zyrtare ku ka marrë pjesë. Tashmë, Mbappe është kthyer në kryeqytetin spanjoll dhe ka nisur fazën e rehabilitimit në ambientet e qendrës stërvitore të klubit mbretëror. Ndërkohë, sa i përket kombëtares franceze, ajo do të duhet të bëjë pa shërbimet e kapitenit të saj në ndeshjet e ardhshme që i Përfaqësuesja do t'i zhvillojë kundër Belgjikës dhe Italisë.