Sistemi energjetik i Kosovës pasurohet me KRE-në, Kurti: Investimi amerikan prej 236.7 milionë dollarësh garanton siguri për të ardhmen

Ministria e Ekonomisë ka organizuar mbledhjen e parë themeluese të Bordit të Korporatës për Ruajtjen e Energjisë (KRE Sh.A.), e cila është ndërmarrje publike e krijuar me qëllim të zgjerimit të kapaciteteve për depozitimin e rrymës elektrike në vend. Gjatë këtij takimi, kryeministri i Kosovës, Albin Kurti, vlerësoi se themelimi i këtij institucioni shënon një kthesë të rëndësishme për përmirsimin e infrastrukturës energjetike, duke theksuar domosdoshmërinë e ruajtjes së energjisë për momentet e ngarkesave të larta në rrjet. Kreu i ekzekutivit shpjegoi se me funksionalizimin e kësaj ndërmarrjeje, sektori energjetik i vendit po pajiset me një mekanizëm jetik që ka munguar ndër vite, duke plotësuar zinxhirin ekzistues të prodhimit dhe transmetimit. “Ne kemi KEK-un dhe Ibër-Lepencin që prodhojnë energji elektrike, e kemi KEK-un që transmeton atë, kurse tani e kemi edhe Korporatën e Re të Kosovës për Energji (KRE), e cila do ta ruajë energjinë për orët kur na duhet më së shumti. Me këtë ndërmarrje të re publike, po i shtojmë sistemit tonë energjetik një aftësi e cila i ka munguar. Që në hartimin e Programit Kompakt me partnerët amerikanë, kemi punuar që investimi në bateri të shoqërohet me krijimin e një ndërmarrjeje e cila do t’i zotërojë dhe do t’i menaxhojë. Pas nënshkrimit të marrëveshjes së bashkëpunimit me Korporatën Sfidat e Mijëvjeçarit (MCC), kemi themeluar edhe KRE-në. Sot, me mbledhjen e parë të bordit, vazhdojmë punën për ta bërë ndërmarrjen sa më funksionale. KRE-ja është 100% në pronësi të Republikës së Kosovës, pra është pasuri e përbashkët e qytetarëve tanë. Pasurinë publike e mbrojmë duke e mirëmenaxhuar dhe duke e shtuar. Ndërmarrjet tona publike duhet të jenë të suksesshme, të krijojnë vlerë ekonomike dhe këtë vlerë ta vënë në shërbim të qytetarëve tanë. Ky është orientimi ynë edhe me KRE-në”, deklaroi Kurti. Ndër të tjera, kryeministri bëri të ditur se Programi Kompakt mbështetet në një buxhet të përgjithshëm prej 236.7 milionë dollarësh, ku pjesa dërrmuese sigurohet përmes granteve nga Shtetet e Bashkuara të Amerikës. “Programi Kompakt ka vlerën e përbashkët prej 236.7 milionë dollarë. Nëpërmjet kësaj, 202 milionë dollarë janë grant nga Shtetet e Bashkuara të Amerikës përmes Korporatës Sfidat e Mijëvjeçarit, dhe 34.7 milionë janë kontribut nga Qeveria e Kosovës. Është një investim i përbashkët në sigurinë energjetike dhe në zhvillimin afatgjatë në Kosovë. KRE-ja do të ketë për qëllim t’i operojë bateritë në Istog, me fuqi prej 125 megavatësh dhe kapacitet ruajtës prej 250 megavat-orë energji. Bashkë me sistemin prej 99 megavat-orësh të KEK-ut, KRE-ja do të ketë 340 megavat-orë kapacitet total për ruajtjen e energjisë. Në praktikë, kjo do të thotë ta ruajmë energjinë kur e kemi të lirë, për ta kthyer më vonë, atëherë kur na duhet më së shumti. Kështu zvogëlojmë nevojën për importe në orët e pikut dhe e ndihmojmë balancimin e sistemit”, shtoi ai. Në fjalën e tij drejtuar anëtarëve të bordit, shefi i qeverisë kërkoi angazhim maksimal, duke vënë theksin te profesionalizmi, parimet e meritokracisë dhe transparenca llogaridhënëse. “Të nderuar anëtarë të bordit, përvoja juaj në energjetikë, financa, drejtësi dhe administratë publike është e shkëlqyer. Nga ju presim që të udhëhiqni ndërmarrjen mbi bazë të rekrutimit me meritë, vendimmarrjes profesionale dhe llogaridhënies së lartë. Teknologjisë së re duhet t’i përgjigjemi me qeverisje të mirë. Qytetarëve të cilëve u shërbejmë, u detyrohemi përgjegjësi për mbarëvajtjen e kësaj ndërmarrjeje”, përfundoi Kurti.