Getafe synon goditjen e madhe në merkato, anglezi Jadon Sancho në radhët e klubit spanjoll

Klubi spanjoll Getafe ka shfaqur interesim konkret për anësorin anglez Jadon Sancho, duke e konsideruar atë si një përforcim me peshë për fazën offensive, nëse arrihet të gjendet një formula e duhur për realizimin e kësaj marrëveshjeje. Sipas gazetarit Pablo Pinto, i cili ka folur për platformën “DAZN”, profili i futbollistit pëlqehet jashtëzakonisht shumë nga trajneri José Bordalás. Tekniku e vlerëson Sanchon për shkak të shpejtësisë në depërtim dhe aftësisë për të krijuar epërsi në situatat një kundër një, ndërsa fakti që ai mund të operojë në të dy krahët e sulmit do t'i jepte më shumë opsione stafit teknik. Megjithatë, ky operacion paraqet sfida të konsiderueshme financiare, kryesisht për shkak të pagës së lojtarit që llogaritet rreth katër milionë euro. Kjo shifër duket e lartë për buxhetin dhe mundësitë reale të Getafes. Pavarësisht kësaj, drejtuesit e klubit nga Madridi po studiojnë alternativa të ndryshme për ta bërë të mundur transferimin. Interesi për Sanchon dëshmon se ai vazhdon të mbetet një emër i lakuar në elitën e futbollit spanjoll, duke kujtuar se edhe gjatë afatit kalimtar të verës një tjetër skuadër e La Ligës ishte interesuar për situatën e tij. Për të krijuar hapësirë në buxhetin e pagave, klubi po shqyrton mundësinë e shfrytëzimit të rastit të Juanmit, i cili aktualisht është i dëmtuar. Nëse plotësohen kriteret për regjistrimin e një mungese të gjatë për arsye mjekësore, Getafe mund të përfitojë liri më të madhe financiare, ndonëse kjo lëvizje e vetme nuk garanton plotësimin e plotë të pagës së lartë të anglezit. Ndërkohë, Getafe mbetet aktive në treg duke planifikuar edhe lëvizje të tjera, pasi së fundmi ka siguruar shërbimet e Dani Carvajalit, ndërsa po analizon seriozisht edhe mundësinë e transferimit të Dani Parejos. Një detaj mjaft interesant i kësaj historie është fakti se Jadon Sancho dhe Dani Carvajal kanë qenë protagonistë si kundërshtarë në finalen e madhe të Ligës së Kampionëve për vitin 2024, ku Real Madridi triumfojë ndaj Borussia Dortmundit për të rrëmbyer trofeun e çmuar.