Prapaskena e bujshme: Si u refuzua transferimi i Armando Brojës te Juventusi

Ish-futbollisti dhe menaxheri i njohur i lojtarëve, Sokol Haxhia, ka zbuluar një detaj të panjohur më parë rreth karrierës së sulmuesit të Kombëtares Shqiptare, Armando Broja, gjatë kohës kur ky i fundit ishte pjesë e gjigantit anglez, Chelsea. I ftuar në “Klan News”, Haxhia ka rrëfyer se transferimi i sulmuesit kuqezi te skuadra e njohur italiane, Juventus, ka qenë një marrëveshje e kryer, e cila megjithatë u la në harresë në momentet e fundit. Sipas tij, ai posedonte autorizimin zyrtar nga klubi torinez për të udhëhequr bisedimet, ndërsa vetë lojtari menaxhohej nga një agjenci e njohur nga Anglia. Sipas menaxherit, negociatat me drejtorin sportiv të bardhezinjve kishin arritur në fazën përfundimtare. Plani parashikonte që Broja të kalonte nga Chelsea te Juventusi në formë huazimi, i cili përfshinte edhe opsionin e blerjes përfundimtare të kartonit të tij në fund të periudhës. Megjithatë, marrëveshja u prish për shkak të vullnetit të vetë lojtarit. Haxhia theksoi se sulmuesi shqiptar zgjodhi të refuzojë këtë mundësi të artë për të vazhduar aventurën e tij në futbollin anglez, një vendim që sipas tij mund të kishte ndryshuar rrjedhën e karrierës së një lojtari me potencial kaq të lartë.