Gjyqi për krime lufte në Zhegër: Dragotin Naskoviq refuzon akuzat, prokuroria premton prova

Gjykata Themelore në Prishtinë po zhvillon procesin gjyqësor ndaj Dragotin Naskoviq, ish-komandantit të nënstacionit policor në Zhegër të Gjilanit, i cili ngarkohet me vepra penale kundër popullsisë civile gjatë kohës së luftës. Në nisje të kësaj seance, i pandehuri është deklaruar plotësisht i pafajshëm për akuzat që i faturohen. Në anën tjetër, gjatë fjalës hyrëse, prokurori special Armend Zenelaj ka theksuar se gjatë këtij gjykimi do të dokumentohen plotësisht pretendimet e ngritura në aktakuzë. Sipas tij, ekzistojnë dëshmi se forcat serbe kanë ndërmarrë sulme dhe vrasje të civilëve në këtë zonë pikërisht me urdhër të Naskoviq. “Do të vërtetohet se forcat serbe nën komandën e këtij të akuzuari, më 30 mars 1999, hynë në fshatin Zhegër dhe kryen vrasjen e civilëve shqiptarë. Më 30 prill 1999 u kryen gjithashtu vrasjet e anëtarëve të familjeve Shabani dhe Hysnei”, u shpreh prokurori gjatë seancës. Dragotin Naskoviq ishte prangosur në shtator të vitit 2024 në pikën e kalimit kufitar te Dheu i Bardhë, ndërsa aktakuza zyrtare ndaj tij u finalizua në muajin nëntor të vitit 2025. Seancat e këtij gjykimi kanë nisur zyrtarisht në dhjetor të vitit 2025 pranë Gjykatës Themelore në Prishtinë.