Përfaqësuesja e Kosovës rrugës për në Vjenë, “Dardanët” bëjnë thirrje për mobilizim masiv të bashkatdhetarëve

Përfaqësuesja e Kosovës ka nisur udhëtimin drejt kryeqytetit austriak, ku këtë të diel do të matë forcat me Austrinë, në kuadër të ndeshjeve të Ligës së Kombeve. Dueli do të luhet në “Ernst Happel Stadion” me fillim nga ora 18:00, ndërkohë që tifogrupi zyrtar i Kosovës ka ndezur atmosferën duke kërkuar një bashkim të madh të shqiptarëve që jetojnë apo ndodhen në Vjenë. Nëpërmjet një njoftimi zyrtar, “Dardanët” kanë bërë të ditur se të dielën, duke filluar nga ora 13:00, anëtarët e grupit dhe gjithë bashkatdhetarët e tjerë do të grumbullohen në një pikë të caktuar, për t’u nisur më pas të organizuar drejt impianteve sportive. “Ne si ‘Dardanë’ tashmë vetëm që kemi marrë rrugë drejt kryeqytetit austriak për t’i përkrahur djemtë tanë. Ju bëjmë thirrje që nesër të gjithë anëtarët e grupit tonë dhe të gjithë shqiptarët tjerë që do të jenë pjesë e stadiumit, të mblidhemi nga ora 13:00 për të vazhduar pastaj së bashku në stadium”, thuhet në kumtesën e tyre. Tifozët kuqezi shfaqen tejet optimistë për këtë përballje, duke u mbështetur te starti i suksesshëm dhe bindës i kësaj fushate. “Ashtu siç e kemi nisur furishëm dhe me paraqitje bindëse këtë kampanjë kualifikuese, jemi besimplotë që edhe nesër do të dalim me rezultat pozitiv. Këta djem, kudo që të luajnë, brenda apo jashtë, asnjëherë nuk do të jenë vetëm”, shtohet tutje në njoftim. Përveç kësaj, udhëheqësit e tifogrupit kanë garantuar se mbështetja nga shkallët e stadiumit do të jetë e zjarrtë dhe se zëri shqiptar do të dominojë në Vjenë. “Edhe nesër stadiumi do të jehojë shqip, si kurdoherë, ngaqë këta djem janë përfaqësimi më i mirë i Republikës së Kosovës dhe krenaria e mbarë shqiptarëve”, përfundon mesazhi i tyre, i shoqëruar me thirrjen tradicionale: “BESA, BESË!”.