Kërcënimi nga qielli: Meksika alarmohet nga përdorimi i avancuar i dronëve prej kartelave të drogës

Autoritetet më të larta të sigurisë në Meksikë kanë ngritur alarmin për përhapjen e shpejtë të teknologjisë së dronëve nga grupet kriminale të trafikut të narkotikëve, një dukuri që tashmë përbën një rrezik të mirëfilltë për sigurinë kombëtare të vendit. Deklaratat e Sekretarit të Mbrojtjes Kombëtare, Ricardo Trevilla Trejo, të dhëna ditën e martë, vijnë në një kohë kur raportet tregojnë se disa anëtarë të kartelave meksikane po angazhohen si mercenarë në Ukrainë, me qëllim që të përfitojnë trajnime të drejtpërdrejta në taktikat moderne të luftimit me mjete fluturuese pa pilot. “Po, ato na shqetësojnë në të gjithë vendin. Kjo është arsyeja pse që nga viti i kaluar, ne kemi blerë shumë sisteme anti-dronë fikse dhe të lëvizshme. Ne gjithashtu i kemi ato përgjatë gjithë kufirit dhe kryejmë operacione në koordinim me SHBA-në“, u shpreh Trejo gjatë fjalës së tij. Gjatë datave 4 dhe 11 tetor, forcat e armatosura meksikane njoftuan sekuestrimin e 15 dronëve me fibra optike në rajonin veriperëndimor të Sinaloas, një metodë që përdorur masivisht në konfliktin aktual mes Rusisë dhe Ukrainës. Territori i Sinaloas ndodhet në epiqendrën e përleshjeve të fundit mes bandave kriminale, të cilat u nxitën pas përçarjes së Kartelit të Sinaloas në dy fraksione që luftojnë për supremaci territoriale. Sipas zyrtarit të lartë, ndonëse autoritetet ende nuk i kanë identifikuar saktësisht fraksionet përgjegjëse për këtë teknologji, përdorimi i saj është shtrirë përtej zonave veriore. Kjo situatë ka prekur drejtpërdrejt edhe popullsinë civile; në muajin gusht, banorët e fshatit të vogël Los Bayados, në shtetin Guerrero, u detyruan të braktisnin vatrat e tyre për shkak të sulmeve të njëpasnjëshme me dronë nga organizatat kriminale. “Ne besojmë se ata përdorin gjerësisht dronët komercialë, të cilët më vonë i modifikojnë për të sulmuar grupet rivale dhe në shumë raste edhe autoritetet. Megjithatë, këta nuk janë dronë shumë të sofistikuar“, përfundoi Trejo.