Modeli i suksesshëm i Kosovës në digjitalizim prezantohet në Samitin Digjital të Ballkanit Perëndimor

Arben Damoni, koordinator i programeve pranë Njësisë për Transformim Digjital në Ministrinë e Digjitalizimit dhe Administratës Publike (MDAP), ka përfaqësuar Kosovën në Samitin Digjital të Ballkanit Perëndimor 2026, të mbajtur në Mal të Zi. Ai ishte pjesë e panelit të diskutimit me tematikën “Qeverisja lokale digjitale: Përafrimi i shërbimeve publike me qytetarët”. Gjatë fjalës së tij, Damoni nënvizoi domosdoshmërinë e krijimit të platformave të përbashkëta digjitale. Sipas tij, ky mekanizëm i mundëson komunave, veçanërisht atyre me burime të kufizuara financiare dhe njerëzore, të ofrojnë shërbime cilësore pa pasur nevojë për zhvillimin e sistemeve të veçanta dhe të kushtueshme. Duke shpalosur vizionin e Kosovës, Damoni veçoi rolin e platformës “eKosova” në integrimin e shërbimeve komunale. Përdorimi i moduleve të përbashkëta digjitale, siç theksoi ai, po dëshmohet si një strategji efikase për shfrytëzimin optimal të resurseve shtetërore dhe thjeshtësimin e procedurave për qytetarët. Në prezantimin e tij, përfaqësuesi i MDAP-së vuri theksin edhe te përparimi i shënuar në zgjerimin e rrjetit të internetit me shpejtësi të lartë përmes projektit KODE. Po ashtu, ai bëri thirrje për investim të vazhdueshëm në ngritjen e kompetencave digjitale të administratës publike, si parakusht për një transformim të suksesshëm. Sipas Damonit, gjithëpërfshirja e të gjitha komunave në këtë proces është kyçe për të garantuar që digjitalizimi të jetë një përfitim i prekshëm për çdo qytetar, pavarësisht nga zona ku jeton. Ky angazhim i Ministrisë së Digjitalizimit dhe Administratës Publike në samitet rajonale shërben si një platformë e rëndësishme për shkëmbimin e ekspertizës dhe thellimin e bashkëpunimit ndërshtetëror, me qëllim modernizimin e qeverisjes lokale dhe rritjen e transparencës ndaj qytetarëve.