Dhunë ndaj 19-vjeçarit, Policia pezullon 4 efektivë dhe shefin e Rendit pas pamjeve të rënda

Policia e Shtetit ka reaguar zyrtarisht pas publikimit të pamjeve shqetësuese, ku shfaqet një i ri duke u tërhequr zvarrë nga efektivët e policisë. Ngjarja, e cila ka shkaktuar reagime të shumta, ka sjellë masa të menjëhershme disiplinore ndaj personave të përfshirë në këtë veprim. Drejtori i Përgjithshëm i Policisë së Shtetit ka urdhëruar pezullimin e menjëhershëm nga detyra të katër punonjësve të policisë, si dhe të shefit të Rendit në Komisariatin Nr. 1, nënkomisar F. K. Drejtoria e Standardeve Profesionale ka nisur ndërkohë një hetim disiplinor për të zbardhur në detaje shkeljet e kryera. Verifikimet përqendrohen te trajtimi i 19-vjeçarit L. B., i cili shfaqet në video me dëmtime në këmbë, teksa po shoqërohej nga forcat e rendit pranë godinës së Parlamentit për t'u dërguar drejt institucionit shëndetësor. Një grup i posaçëm pune është ngritur për të analizuar të gjitha veprimet e efektivëve gjatë gjithë kohëzgjatjes së protestës, me qëllim konstatimin e çdo tejkalimi të kompetencave. Krahas hetimeve të brendshme, Agjencia e Mbikëqyrjes Policore po bashkëpunon ngushtë me Prokurorinë për të kryer një hetim të plotë mbi rrethanat e rastit. Çdo punonjës që ka shpërfillur procedurat standarde do të mbajë përgjegjësi ligjore. Në reagimin e saj, Policia e Shtetit ka nënvizuar se aktet e dhunës, shkatërrimit të pronës dhe djegieve të ndodhura në kryeqytet nuk mund të konsiderohen pjesë e protestës paqësore. Institucioni ka bërë thirrje për ndërprerjen e menjëhershme të këtyre akteve nga personat e maskuar, duke paralajmëruar se ndaj tyre do të ushtrohet forca e ligjit. Në të njëjtën kohë, autoritetet u kanë kërkuar qytetarëve që të distancohen nga elementët e dhunshëm, me qëllim ruajtjen e sigurisë së tyre gjatë zhvillimit të tubimeve.