Tragjedi në qelinë e Burgut të Reçit: Ndërron jetë i dënuari që vrau bashkëshorten në vitin 2015

Një ngjarje e rëndë është regjistruar në institucionin e vuajtjes së dënimit në Reç, ku një prej të burgosurve ka ndërruar jetë. 49-vjeçari Agron Llapushi u gjet pa shenja jete në zonën e dusheve, ndërkohë që hetimet e para tregojnë se ai mund t'i ketë dhënë vetë fund jetës. Llapushi, i cili ishte me origjinë nga fshati Holtas dhe banonte në Çekin të Gramshit, vuante dënimin për një krim të kryer në vitin 2015, kohë kur kishte privuar nga jeta bashkëshorten e tij, Alketa Llapushi. Pas kthimit të tij nga emigracioni në Greqi, ai e kishte mbytur gruan me duar dhe litar në një tokë bujqësore në Gramsh, duke e lënë të vdekur në vend. Gjatë kohës së krimit, çifti kishte lënë pas dy fëmijë, të cilët në atë periudhë ishin të mitur, ndërsa sot janë përkatësisht 20 dhe 19 vjeç. Gjatë viteve të tij në qeli, Llapushi kishte pasur mungesë totale të kontakteve familjare, duke regjistruar vetëm dy vizita nga të afërmit, përkatësisht një në vitin 2023 dhe një tjetër në vitin 2025. Pas kryerjes së aktit fatal në vitin 2015, 49-vjeçari ishte dorëzuar vetë në organet e rendit, duke pranuar krimin e kryer. Megjithëse Prokuroria për Krime të Rënda kishte kërkuar dënimin e tij me burgim të përjetshëm, Gjykata e Shkallës së Parë për Krime të Rënda e dënoi atë me 24 vite e 4 muaj burg për veprën penale “Vrasje për shkak të marrëdhënieve familjare”. Vendimi kishte marrë formë të prerë më 10 dhjetor 2015, ndërsa ai ishte arrestuar tetë muaj më parë, më 1 prill 2015. Në dëshminë e tij dhënë pas ngjarjes, vetë Llapushi kishte pranuar krimin, duke e lidhur atë me tensionet e krijuara nga gjendja e vështirë ekonomike. Ai kishte deklaruar se ishte martuar me viktimën në vitin 2001 dhe kishte punuar për vite me radhë si emigrant në qytetin e Verias në Greqi. “Para një viti unë kam pasur çrregullime mendore dhe kam kaluar në depresion, ku në disa raste më ka vajtur mendja të vrisja veten. Po kështu para një viti kam bërë një vizitë tek një psikolog në Elbasan me emrin Enrik. Unë kam katër ditë që kam ardhur nga Greqia dhe në fshatin ku unë banoj në Çekin jam në kushte të vështira ekonomike, ku unë jetoj bashkë me nusen time dhe dy fëmijët në një dhomë të vetme,” ishte shprehur ai në dëshminë e tij. Më tej, ai kishte treguar detajet e asaj dite: “Sot unë kam shkuar në mëngjes për të punuar në një tokë larg shtëpisë në vendin e quajtur ‘Mhalla e Lepurit’ dhe atje në punë e sipër jam konfliktuar me Alketën, dhe gjatë konfliktit unë e kam shtrënguar me duar në fyt derisa ajo ka humbur ndjenjat. Pas kësaj kam shkuar në shtëpi dhe kam lajmëruar me telefon vëllain tim Alfredin dhe pastaj kam shkuar dhe jam dorëzuar në polici. Marrëdhëniet në përgjithësi me Alketën i kam pasur të mira, nuk kemi pasur probleme. As vetë nuk e di si ndodhi…” Për të vlerësuar gjendjen e tij mendore në momentin e vrasjes së bashkëshortes, organi i akuzës kishte urdhëruar kryerjen e një ekspertize psikiatrike, konkretisht aktin e ekspertimit psikiatriko-ligjor nr. 194, datë 16 qershor 2015. Mjekët ekspertë kishin dhënë përgjigje nëse i pandehuri shfaqte ndonjë çrregullim psikiatrik gjatë kryerjes së veprës penale dhe nëse kjo kishte ndikuar në përgjegjshmërinë e tij ligjore. Konkluzioni i ekspertizës ishte se ai nuk vuante nga asnjë sëmundje apo çrregullim i rëndë mendor apo neuropsikik, dhe se simptomat e pretenduara prej tij nuk plotësonin kriteret e një patologjie mendore madhore.