Gjysmë shekulli histori: Fillon ndërtimi i stadiumit dhe qendrës së re sportive për Shkëndijen e Haraçinës

Pas një rrugëtimi prej afro pesë dekadash të mbushur me traditë dhe pasion për futbollin, Shkëndija e Haraçinës po bëhet gati të hapë një faqe krejtësisht të re në fushën e infrastrukturës sportive. Koalicioni VLEN ka njoftuar se kanë nisur zyrtarisht punimet për ngritjen e një qendre moderne sportive në këtë komunë, një projekt ky i ndërmarrë nga qeverisja lokale me mbështetjen e institucioneve qendrore. Iniciativa synon të ofrojë kushte bashkëkohore për stërvitje dhe zhvillim, duke i kushtuar vëmendje të veçantë klubit lokal, fëmijëve dhe rinisë së Haraçinës. “Pas 50 vitesh histori, traditë dhe pasion për futbollin, Shkëndija e Haraçinës po merr infrastrukturën që e ka merituar prej vitesh”, theksohet në komunikatën zyrtare. Sipas të dhënave nga VLEN, ky projekt po udhëhiqet nga kryetari i Komunës së Haraçinës, Daut Beqiri, ndërsa mbështetja nga niveli qendror u konfirmua edhe përmes angazhimit të zëvendësministres së Sportit, Safije Sadiki Shahini, e cila mori pjesë në aktivitetet për promovimin e këtyre investimeve infrastrukturore. Në njoftim nënvizohet se ky investim nuk përfaqëson thjesht përmirësim të kushteve fizike, por përbën një vizion të qartë për të ardhmen e gjeneratave të reja. “Për Daut Beqirin, ky projekt përfaqëson një hap të rëndësishëm për sportin në Haraçinë, por edhe një investim në gjeneratat e reja”, shtohet në shkrim. Thelbi i këtij plani ambicioz është pikërisht e ardhmja e Shkëndijës së Haraçinës. Synimi afatgjatë është që ky kompleks i ri sportiv të shërbejë si trampolinë për fazën më të rëndësishme të projektit, që është ndërtimi i stadiumit kryesor të klubit. “Qendra sportive është pjesë e vizionit që Shkëndija të ketë infrastrukturën që i përgjigjet historisë së saj 50-vjeçare”, shpjegojnë nga VLEN. Ky zhvillim shënon vetëm fillimin e transformimit të sportit në zonë, ndërsa hapat e ardhshëm do të përqendrohen te finalizimi i stadiumit të ri. “50 vite histori. Një kapitull i ri për Shkëndijen dhe Haraçinën”, përmbyllet njoftimi.