Mitrovica shkëlqen: Përfundon instalimi i ndriçimit publik në dhjetëra zona të qytetit dhe fshatrave

Kryetari i Mitrovicës, Faton Peci, ka njoftuar për një sukses të rëndësishëm infrastrukturor, duke bërë të ditur se për një periudhë prej më pak se dy muajsh, është kompletuar rregullimi dhe vënia në funksion e ndriçimit publik në një numër të madh rrugësh, sheshesh, parqesh dhe hapësirash publike si në zonën urbane ashtu edhe në ato rurale. Nëpërmjet një komunikimi publik, Peci ka detajuar se intervenimet teknike kanë përfshirë akse të rëndësishme rrugore dhe lagje të ndryshme, duke shtrirë rrjetin e ndriçimit edhe në fshatrat Shipol, Kçiq i Madh, Zhabar, Gushavc, Suhodoll, Vinarc, Stantërg dhe Bare. Krahas këtyre zonave, ndriçimi modern është funksionalizuar edhe në hapësira me frekuentim të lartë, siç janë Shëtitorja e Liqenit Akumulues, Qendra Zejtare dhe perimetri përreth Kishës Ortodokse, duke krijuar një ambient më të sigurt për të gjithë banorët. I pari i Mitrovicës ka konfirmuar se intensiteti i punimeve mbetet i lartë, me një planifikim që synon mbulimin e çdo lagjeje dhe fshati, me qëllimin e vetëm që të rritet siguria dhe të përmirësohet cilësia e jetës së qytetarëve. “Më shumë ndriçim, më shumë siguri!”, ka deklaruar Peci, duke nënvizuar përkushtimin e institucionit që ai drejton për modernizimin e infrastrukturës lokale.