Incidenti në dasmën e Aurorës: Benita Zena thyen heshtjen pas videos virale dhe akuzave për fustanin

Ish-banorja e reality show-t 'Big Brother VIP Kosova', njëherësh këngëtarja Benita Zena, ka reaguar për herë të parë pas publikimit të një videoje që shkaktoi bujë në rrjetet sociale. Në pamjet e shkëputura nga dasma e Aurorës, dëgjohet një thirrje drejtuar Labinotit, ku thuhet: “Labinot, Benitën jashtë me qit”, fjali që u interpretua si një reagim i ashpër nga ana e motrës së nuses, Shkurta. Në një intervistë për emisionin 'Prive', Benita sqaroi rrethanat e ngjarjes, duke theksuar se në momentin e parë nuk ishte në dijeni të identitetit të personit që po bërtiste. Ajo rrëfeu se fillimisht kishte menduar se bëhej fjalë për një nga organizatoret e dasmës, deri në momentin kur u prezantua me të. “Unë faktikisht atë video e mora dje nga dikush, pasi nuk kam qenë shumë e informuar për atë që po qarkullonte. Për vajzën në fjalë, në fillim mendova se ishte organizatore e dasmës derisa më prezantuan. Nuk kam ndonjë koment më tepër, unë sërish jam kënaqur në dasmë, e kam shijuar deri në fund dhe çiftit ua uroj gjithë të mirat”, u shpreh këngëtarja. Spekulimet lidhur me këtë incident besohet se kanë nisur për shkak të veshjes së Benitës në dasmë. Megjithëse fustani që ajo kishte zgjedhur ishte në një nuancë të hapur të kaltër, në fotografitë dhe videot e publikuara ai dukej si i bardhë. Kjo ngjyrë e fustanit, që shpesh konsiderohet e papërshtatshme për t'u veshur nga të ftuarit në dasma, nxiti reagime të shumta dhe komente kritike nga ndjekësit në internet.