“Ju ftoj të shikoni vetëm minutën e parë të ndeshjes kundër Villarrealit, është e mjaftueshme” – Mourinho flet për referimin në La Liga

José Mourinho shmangu polemikat lidhur me gjyqtarët në konferencën për shtyp para ndeshjes ndaj Romës në Ligën e Kampionëve. Normalisht, pyetjet për gjyqtarët do t’i ishin drejtuar portugezit pas ndeshjes kundër Villarrealit, por ai vendosi të mos paraqitej në konferencën për shtyp. Sipas klubit, arsyeja ishte shmangia e çdo deklarate që mund ta çonte drejt një dënimi pas përjashtimit të Vinicius Juniorit. Në Romë, Mourinho u përball me pyetjet që nuk iu drejtuan në “Santiago Bernabéu”, por vendosi të mos u përgjigjej atyre. Megjithatë, ai i ftoi gazetarët ta rishikonin ndeshjen, duke paralajmëruar se do të flasë për këtë çështje në konferencën për shtyp të së shtunës, para duelit kundër Sevillas. “Asgjë, asgjë. Është ndeshje e Ligës së Kampionëve dhe nuk kam asgjë për të komentuar për ndeshjen e kampionatit. Ju ftoj të shikoni vetëm minutën e parë të ndeshjes kundër Villarrealit. Nëse dëshironi, mund të flasim të shtunën. Minuta e parë mjafton për ata që kuptojnë”, deklaroi Mourinho. Sipas informacioneve të siguruara nga AS, Mourinho i referohej një pozite jashtë loje të akorduar ndaj Kylian Mbappés, kur sapo kishte përfunduar minuta e parë e ndeshjes. Në atë aksion, Federico Valverde i pasoi topin sulmuesit francez, i cili u përpoq ta kontrollonte atë. Megjithatë, pozita jashtë loje u sinjalizua para se Mbappé ta pranonte topin. Pamjet televizive nuk e bëjnë të qartë nëse, në momentin kur Valverde e dha pasimin, Mbappé ishte apo jo në pozitë jashtë loje. Në çdo rast, bëhej fjalë për një aksion shumë të ngushtë, ku gjithçka mund të vendosej nga disa centimetra, por që u sinjalizua si një pozitë e qartë jashtë loje. Pikërisht ky duket të jetë rasti që Mourinho dëshiron të diskutojë të shtunën.